कोल्हापूर : पूर्ववैमनस्यातून राजारामपुरी पोलीस ठाण्याच्या हद्दीतील तीनबत्ती चौकातील घरांवर अज्ञात जमावाने हल्ला करत काही घरांमधील प्रापंचिक साहित्यासह तीन दुचाकींची तोडफोड केली. बुधवारी संध्याकाळी सव्वासात वाजण्याच्या सुमारास झालेल्या या प्रकाराने परिसरात काहीकाळ तणाव निर्माण झाला होता. पोलिसांनी तत्काळ घटनास्थळी धाव घेतल्याने तणाव निवळण्यास मदत झाली. पूर्ववैमनस्यातून बुधवारी रात्री सव्वासात वाजण्याच्या सुमारास १५ ते २० अज्ञात हल्लेखोरांनी या परिसरातील घरांवर अचानक हल्ला केला. त्यात काही घरांमधील साहित्याची तोडफोड केली. हे हल्लेखोर हातात दगड, लाकडी दंडुके, फरशांनी दिसेल त्या बंद घरांच्या दरवाजांची तोडफोड करत सुटले होते. यावेळी काही घरांमध्ये घुसून त्यांनी प्रापंचिक साहित्याची तोडफोड करून नुकसान केले. या दरम्यान हल्लेखोर दिसेल त्या महिलांनाही मारत सुटले होते. यात रातआंधळी असलेल्या महिलेलाही या हल्लेखोरांनी सोडले नाही. तीही या हल्ल्यात जखमी झाली. तिला रात्री उशिरा नातेवाईकांनी सेवा रुग्णालयात उपचारासाठी दाखल केले. काही घरांवर हल्ला करून या टोळक्याने चौकात उभ्या केलेल्या तीन दुचाकींचीही तोडफोड केली. या घटनेनंतर परिसरातील नागरिकांनी संताप व्यक्त करत राजारामपुरी पोलीस ठाण्यात धाव घेतली. या घटनेचे गांभीर्य ओळखून शहर पोलीस उपअधीक्षक मंगेश चव्हाण यांच्यासह राजारामपुरी पोलीस ठाण्यातील कर्मचाऱ्यांनी घटनास्थळी धाव घेतली. यानंतर तत्काळ पोलिसांनी चौकात बसवलेल्या तीन सीसीटीव्ही कॅमेऱ्यांच्या फुटेजद्वारे संशयित टोळक्यांचे फुटेज ताब्यात घेतले असून, त्याआधारे तपासाला सुरुवात केली आहे. दरम्यान, रात्री उशिरापर्यंत संशयितांविरोधात गुन्हा नोंदविण्याचे काम राजारामपुरी पोलीस ठाण्यात सुरु होते.
फोटो : ०२०६२०२१-कोल-तीन बत्ती ०१,०३
ओळी : राजारामपुरी पोलीस ठाण्याच्या हद्दीतील तीनबत्ती चौकातील काही घरांवर बुधवारी संध्याकाळी अज्ञात हल्लेखोरांनी हल्ला करत तोडफोड केली. त्यानंतर मोठ्या प्रमाणात पोलीस फौजफाटा दाखल झाला. फोटो : ०२०६२०२१-कोल-तीनबत्ती ०२
ओळी : राजारामपुरी पोलीस ठाण्याच्या हद्दीतील तीनबत्ती चौकातील काही घरांवर बुधवारी रात्री अज्ञात हल्लेखोरांनी हल्ला करत तोडफोड केली. त्याचे चित्रण सीसीटीव्ही कॅमेऱ्यात कैद झाले आहे.
(छाया : आदित्य वेल्हाळ)