केडीसीसी बँकेतच मिळणार पंधरा रुपयात कर्जासाठीचे ७/१२, ८अ उतारे

BankingSector Kolhapur : कोल्हापूर जिल्हा मध्यवर्ती सहकारी बँकेच्या कर्जासाठी लागणारे ७/१२, ८ अ, नमुना नं. ६ इत्यादी उतारे यापुढे केडीसीसी बँकेतच मिळणार आहेत. यामुळे सरकारी विलंब व चकरा मारण्यापासून शेतकऱ्यांची सुटका होणार असून त्यांना तात्काळ कर्ज मिळणे सोपे झाले आहे.

ठळक मुद्देकेडीसीसी बँकेतच मिळणार पंधरा रुपयात कर्जासाठीचे ७/१२, ८अ उतारेसरकारी विलंब व चकरा मारण्यातून शेतकऱ्याची झाली सुटका     

कोल्हापूर : कोल्हापूर जिल्हा मध्यवर्ती सहकारी बँकेच्या कर्जासाठी लागणारे ७/१२, ८ अ, नमुना नं. ६ इत्यादी उतारे यापुढे केडीसीसी बँकेतच मिळणार आहेत. यामुळे सरकारी विलंब व चकरा मारण्यापासून शेतकऱ्यांची सुटका होणार असून त्यांना तात्काळ कर्ज मिळणे सोपे झाले आहे.           बँकेच्या संचालक मंडळाच्या बैठकीत अध्यक्ष व ग्रामविकास मंत्री हसन मुश्रीफ यांनी हा निर्णय जाहीर केला. विकास सेवा संस्थांच्या कर्जदार सभासद शेतकऱ्यांना सातबारा उताऱ्यांचे वितरण करून या उपक्रमाचा प्रारंभ झाला.            यावेळी अध्यक्ष व ग्रामविकास मंत्री हसन मुश्रीफ म्हणाले, कोल्हापूर जिल्ह्यातील शेतकरी हा या बँकेचा केंद्रबिंदू आहे. बँकेकडून मोठ्या प्रमाणात शेतकऱ्यांना पीक कर्ज दिले जाते.  शेतकऱ्यांचा सातबारा उतारा पाहून पीक -पाणी, इतर बोजे इत्यादी बाबी विचारात घेतल्या जातात. परंतु; सातबारा उतारे मिळण्यात होणाऱ्या विलंबामुळे शेतकऱ्यांना वेळेवर कर्ज मिळणे अडचणीचे होते. त्यामुळे बँकेने सर्व शाखांमधून ही सुविधा सुरू केली आहे.           बैठकीत अमरापुर विकास सेवा संस्था -औरवाड ता. शिरोळचे सभासद शेतकरी झाकीरहुसेन साहेबहजरत पटेल, यशवंत विकास सेवा संस्था- हुनगिनहाळ -ता. गडहिंग्लजचे सभासद शेतकरी काशिनाथ कल्लाप्पा विभुते व बलभीम विकास सेवा संस्था - माले ता. पन्हाळाचे सभासद शेतकरी संभाजी मारुती पाटील यांना बँकेचे अध्यक्ष व ग्रामविकास मंत्री हसन मुश्रीफ व संचालक मंडळाच्या हस्ते सातबारा उताऱ्यांचे वितरण झाले.     बँकेचे अध्यक्ष व ग्रामविकास मंत्री हसन मुश्रीफ यांच्या सूचनेनुसार जमाबंदी आयुक्त आणि संचालक -भूमी अभिलेख, महाराष्ट्र राज्य, पुणे यांच्याशी सामंजस्य करार केला. शेतकऱ्यांना शाखा पातळीवर डिजिटल स्वाक्षरीत अधिकार अभिलेख, ७/१२ व ८ अ उतारे तसेच नमुना नंबर सहा इत्यादी उतारे उपलब्ध करून दिले जाणार आहेत. प्रति उतारे पंधरा रुपये शासनाकडे जमा करावयाचे असून याकरीता मनुष्यबळ, नेटवर्किंग, संगणक व स्टेशनरीसाठी येणारा सर्व खर्च बँक स्वभांडवलातून उचलणार आहे.           यावेळी संचालक मंडळातील ज्येष्ठ संचालक व माजी आमदार महादेवराव महाडिक, आमदार पी. एन. पाटील, राज्यमंत्री राजेंद्र पाटील-यड्रावकर, खासदार प्रा. संजय मंडलिक, आमदार राजेश पाटील, पी. जी. शिंदे, विलासराव गाताडे, अनिल पाटील, आर. के.पोवार, सर्जेराव पाटील -पेरीडकर, अशोकराव चराटी, प्रताप उर्फ भैय्या माने, असिफ फरास, संतोष पाटील, रणजितसिंह पाटील, श्रीमती उदयानीदेवी साळुंखे आदी सदस्य तसेच बँकेचे मुख्य कार्यकारी अधिकारी डॉ. ए.बी. माने उपस्थित होते.