मुरलीधर भवार
कल्याण : विकी मुख्यदल हे ठाण्यातील रेल्वे पोलिस दलात पोलिस शिपाई म्हणून कामाला होते. त्यांची रविवारी रात्रपाळी होती. रात्रपाळीचे काम संपवून ठाण्याहून गाडी पकडून घरी येण्यासाठी ते निघाले. त्यांनी पत्नी हर्षा हिला फोन करून “मी घरी यायला निघालो,” असे सांगितले. मात्र, ते घरी पोहोचू शकले नाहीत. त्याआधीच काळाने त्यांच्यावर घाला घातला. मुंब्रा रेल्वे स्थानकात चालत्या गाडीतून पडून झालेल्या अपघातात त्यांचाही मृत्यू झाला.
विकी हे कल्याण पूर्वेतील लोकग्राम परिसरातील सह्याद्री इमारतीच्या ‘डी’ विंगमध्ये चौथ्या मजल्यावर राहत होते. त्यांचा अपघाती मृत्यू झाल्याची माहिती रेल्वे पोलिसांनी त्यांच्या पत्नीला कळविताच तिच्या पायाखालची जमीन सरकली. बातमी कळताच काही तासांत पोलिस व्हॅन कल्याणच्या लोकग्राम परिसरातील मुख्यदल यांच्या घरी पोहोचली.
मुख्यदल यांचे बुलढाणा जिल्ह्यातील जुमडा (ता. देऊळगाव राजा) हे मूळ गाव. गावी त्यांचे आई, वडील आणि भाऊ आहेत. पार्थिवावर गावी अंत्यसंस्कार होणार असल्याने पोलिस त्यांची पत्नी आणि मुलगा प्रणय याला घेऊन गावी निघाले आहेत.
३ वर्षाच्या मुलाचे बाबा गेले
प्रणय हा अवघा तीन वर्षांचा आहे. प्रणयचा येत्या १७ जून रोजी वाढदिवस आहे. त्याच्या वाढदिवसानिमित्त मुख्यदल आणि त्यांची पत्नी हे उत्साहित होते. ७ जूनला मुख्यदल यांचा वाढदिवस झाला. त्यांनी व्हॉट्सॲपवर सेलिब्रेशनचा डीपी ठेवला होता, हे सांगताना त्यांच्या शेजारी स्नेहा कावळे यांना रडू कोसळले. आम्ही एक चांगला शेजारी गमावला आहे, अशी भावना रहिवाशांनी व्यक्त केली.