डोंबिवली: पतीसमवेत रक्षाबंधनासाठी नणंदेकडे जळगावहून आलेल्या विवाहितेने इमारतीच्या चौथ्या मजल्यावरून उडी मारून आत्महत्या केल्याची घटना शुक्रवारी सकाळी ८ च्या सुमारास आजदेपाडा परिसरात घडली. पतीबरोबर झालेल्या वादातून तीने आत्महत्या केल्याचे बोलले जात असलेतरी यामागचे ठोस कारण समजू शकलेले नाही. पूजा सोळंके (वय १९) रा. मुक्ताईनगर जळगाव असे मृत महिलेचे नाव आहे. या घटनेची नोंद मानपाडा पोलिस ठाण्यात करण्यात आली आहे.
जळगाव येथील मुक्ताईनगरमध्ये पूजा ही पती किरण समवेत राहायची. सहा महिन्यापूर्वीच दोघांचे लग्न झाले होते. पूजा पतीसमवेत रक्षाबंधनासाठी नणंदेकडे डोंबिवलीत आली होती. सकाळी ८ च्या सुमारास पती आणि तिच्यात वाद झाला. यातून रागाच्या भरात तीने इमारतीच्या चौथ्या मजल्यावरून खाली उडी मारून आपले जीवन संपविले. याबाबत मानपाडा पोलिस ठाण्याचे प्रभारी वरीष्ठ निरिक्षक सुरेश मदने यांच्याशी संपर्क साधला असता. पूजाचा आणि पतीचा वाद झाला होता. त्यातून रागाच्या भरात तीने हे पाऊल उचलले आहे अशी प्राथमिक माहीती चौकशीत समोर आली आहे पण यामागचे ठोस कारण समजू शकलेले नाही. पुढील तपास सुरू आहे असे मदने म्हणाले.