कल्याण- गावठी कट्टा विक्री करण्यासाठी कल्याण मध्ये आलेल्या एका सराईत गुन्हेगाराला कल्याण कोळशेवाडी पोलिसांनी बेड्या ठोकल्या आहेत. दानिश अन्सारी असे या सराईत गुन्हेगाराचे नाव आहे. दानिश ने हा गावठी कट्टा उत्तर प्रदेशातून आणला होता . हा गावठी कट्टा विकण्यासाठी तो कल्याणलाआला होता .
कोळसवाडी पोलिस ठाण्याचे पोलीस अधिकारी दिनकर पगारे आणि त्यांचे पथक रात्रीच्या सुमारास कल्याण पूर्व आनंदवाडी परिसरात गस्तीवर होते. याच दरम्यान पोलिसांना एक इसम या परिसरात गावठी कट्टा विकण्यासाठी आला असल्याची माहिती मिळाली . पोलिसांना एक इसम आनंदवाडी परिसरात संशयीतरित्या फिरत असल्याचे आढळून आले. पोलिसांनी तात्काळ त्याला हटकले असता त्याने पळून जाण्याचा प्रयत्न केला त्याचवेळी पोलिसांनी त्याला जागीच जेरबंद केले.
त्याची झडती घेतली असता त्याच्याकडून गावठी बनावटीचा कट्टा आढळला. त्याच्याजवळ चौकशी केली असता त्याचे नाव दानिश अन्सारी असून त्याने उत्तर प्रदेश येथून हा कट्टा विकण्यासाठी आणला होता. कल्याणमध्ये तो ग्राहक शोधत असतानाच त्याला पोलिसांनी बेड्या ठोकल्यात . त्याच्या जवळून गावठी कट्टा हस्तगत केला आहे, अशी माहिती पोलिस अधिकारी सुनिल गवळी यांनी दिली आहे.