डोंबिवली - डोंबिवलीत शनिवारी संध्याकाळी झालेल्या पावसानंतर फेज २ मधील काही भागात रस्त्यावर हिरव्या रंगाचा पाऊस पडला होता. त्यामुळे पुन्हा एकदा डोंबिवलीतील प्रदूषणाची चर्चा सुरू झाली. एमआयडीसी भागात कारखान्यातून येणारे केमिकल पावसाच्या पाण्यात मिसळल्यावर असे रंग रस्त्यावर पसरतात.
दक्ष नागरिक राजू नलावडे यांनी रंगीत पाण्याचे फोटो समाजमाध्यमांवर व्हायरल केले आणि हिरव्या पावसाची चर्चा रंगली. नलावडे म्हणाले की, एमआयडीसीमध्ये काही कंपन्यांचे ड्रेनेज वाहून नेणाऱ्या लाइनच्या टाकीमधून पाणी लिकेज झाल्याचे त्यांना समजले. त्या पाण्याचा पावसाच्या पाण्याशी संपर्क झाला असावा आणि त्याने रंगीत पाणी सर्वत्र जमा झाले असावे असे ते म्हणाले. या रंगीत पाण्याची उद्धवसेनेचे कल्याण जिल्हाप्रमुख दीपेश म्हात्रे यांनी दखल घेत नागरिकांच्यावतीने ते प्रदूषण नियंत्रण मंडळाविरोधात जनआंदोलन करणार असल्याचे त्यांनी सांगितले.