कल्याण-मेडिकल दुकानदाराला दुकान सुरु करण्यासाठी परवाना देण्याच्या बदल्यात ७० हजार रुपयांची लाच स्विकारता औषध निरीक्षक संदीप नारायण नरवणे याला अटक करण्यात आली आहे. नवी मुंबई लाच लुचपत प्रतिबंधक विभागाच्या पोलिसांनी सापळा रचून ही कारवाई केली आहे. नरवणे यांचा साथीदार सुनिल बाळू चौधरी यालाही पोलिसांनी अटक केली आहे. ज्याच्याकडून नवरणे याने लाच स्विकारली तो दुकानदार कल्याणचा रहिवासी आहे. त्याला कल्याणमध्ये मेडिकलचे दुकान सुरु करायचे आहे.
मेडिकलचे दुकान सुरु करण्यासाठी अन्न व औषध विभागाचा परवाना लागतो. कल्याणच्या एका तरुणाला मेडिकलचे दुकान सुरु करायचे होते. त्यांनी अन्न व औषध विभागाकडे तसा अर्ज केला होता. त्यांना परवाना देण्याच्या बदल्यात औषध निरीक्षक नरवणे याने १ लाख रुपयांची मागणी केली होती. १ लाख रुपये दिले तरच परवाना दिला जाईल असे सांगितले होते.
अखेरीस तडजोड करुन नरवणे यांनी ७० हजार रुपये घेण्याचे कबूल केले. या प्रकरणी तक्रारदाराने नवी मुंबईतील लाच लुचपत प्रतिबंधक विभागाच्या पोलिसांकडे तक्रार केली होती. लाच लुचपत प्रतिबंधक विभागाच्या पोलिसांनी कल्याण पश्चिमेतील डी मार्ट जवळ सापळा रचला होता. यावेळी त्याठिकाणी तक्रारदाराकडून ७० हजार रुपयांची लाच स्विकारण्याकरीताऔषध निरीक्षक नरवणे व त्यांचा साथीदारा सुनिल चौधरी त्याठिकाणी पोहचले. ७० हजार रुपयाची लाच स्विकारता दोघांना पोलिसांनी अटक केली आहे. ही कारवाई पोलिस निरिक्षक संतोष पाटील यांनी केली. या प्रकरणी नवरणे याच्यासह त्याचा साथीदार चौधरी या दोघांच्या विरोधात महात्मा फुले पोलिस ठाण्यात गुन्हा दाखल करण्यात आला आहे.