जगाच्या पाठीवर सतत अशा काही घटना घडत असतात ज्यावर विश्वास ठेवणं सहजासहजी सोपं होत नाही. अशीच एक घटना अमेरिकेत घडली आहे. येथील एका २० वर्षीय तरूणीने तिच्या झोंबी डॉलसोबत लगीनगाठ बांधली आहे. या तरूणीने दावा केला आहे की, ती या डॉलसोबत म्हणजेच बाहुलीसोबत ३ वर्षांपासून रिलेशनशिपमध्ये आहे.
लग्न म्हटलं की, प्रत्येकाच्या वेगवेगळ्या अपेक्षा असतात. प्रत्येकाला वाटत असतं की, त्यांच्या पार्टनरकडून त्यांना सर्व आनंद मिळाला पाहिजे. काही असेही असतात ज्याची पार्टनरकडून काही अपेक्षाच नसते. असंच हे प्रकरण म्हणावं लागेल.
झोंबी डॉलसोबत लग्न करणाऱ्या तरूणीची नाव फेलिसिटी कॅडलेक आहे. तर झोंबी डॉलचं नाव केली आहे. कॅडलेक ही अमेरिकेतील मॅसाच्युसेट्सची राहणारी आहे. डेली मेलने दिलेल्या वृत्तानुसार, कॅडलेक ही डॉलसोबत रिलेशनशिपमध्ये आहे आणि कॅडलेकने हातावर डॉलच्या नावाचा टॅटू सुद्धा काढला आहे.
कॅडलेकने नुकतच या डॉलसोबत लग्न केलं. या लग्नाला ३५ हजार रूपये खर्च आला. तसेच या लग्नाला चार कौटुंबिक मित्र, आठ दुसऱ्या डॉल्स होत्या. फेलिसिटीने सांगितलं की, 'मी ज्या प्रकारच्या लग्नाचं स्वप्न पाहिलं होतं, तसंच माझं लग्न झालंय'.
कॅडलेकला ही झोंबी डॉल तिच्या वडिलांनी १३ वर्षांची असताना गिफ्ट दिली होती. तिने सांगितले की, सुरूवातीला या डॉलबाबत माझ्या मनात काही फिलिंग्स नव्हत्या. पण मी १६ वर्षांची झाले तेव्हा माझ्या मनात तिच्याविषयी प्रेमाच्या भावना वाढल्या. आधी माझे बॉयफ्रेन्ड्स होते आणि मला नेहमी वाटत होतं की, माझं त्यांच्यावर प्रेम आहे. पण मला त्या प्रेमाची कधी जाणीव झाली नाही. मात्र केलीवर माझं प्रेम आहे'.
कॅडलेक पुढे सांगते की, '१६ वर्षांची असताना आमच्या रिलेशनशिपमध्ये अनेक उतार-चढाव आलेत. कारण हे चुकीचं आहे म्हणून मी वेगळे झाले होते. पण गेल्यावर्षी आम्ही पुन्हा एकत्र आलो. हे प्रेम आता कधी कमी नाही होणार. मला केलीसोबत सुरक्षित वाटतं. जेव्हा मी तिच्यासोबत असते तेव्हा मला खरा जिव्हाळा जाणवतो'.