मुंबई, दि. 5 - बॉलिवूड अभिनेता अजय देवगण याने(सोमवारी) काल ट्विटरद्वारे आपल्या चाहत्यांसोबत गप्पा मारल्या. मी दोन वाजता ऑनलाइन येईल आणि तुमच्या प्रश्नांना उत्तरं देईल असं ट्विट अजयने केलं. त्याचं हे ट्विट पाहून त्याच्या चाहत्यांनी प्रश्नांची सरबत्ती त्याच्यावर केली.
अजय देवगणच्या चाहत्यांनी त्याच्या करिअरपासून ते पर्सनल लाइफपर्यंत अनेक प्रश्न त्याला विचारले आणि अजयनेही अगदी सहज सर्व प्रश्नांची उत्तरं दिली. पण चाहत्यांच्या प्रश्नांची उत्तरं देताना अचानक आलेल्या एका प्रश्नाने अजय देवगण दचकला. कारण हा प्रश्न विचारला होता तो थेट त्याची धर्मपत्नी काजोल हिने. 'तर, तू जेवायला कधी येणार आहेस' असा प्रश्न काजोलने विचारला होता.
काजोलने जाणूनबुजून हा प्रश्न विचारला असल्याचं अजय देवगणच्या लक्षात आलं आणि त्याच स्टाइलमध्ये आपण डाएटवर असल्याचं उत्तर त्याने काजोलला दिलं.
दोघांमधलं हे संभाषण ट्विटराइट्सच्या चांगलंच पसंतीस पडत आहे. तर काहींनी अजय देवगणला आत्ता त्रास देऊ नकोस, कारण तो आमच्याशी गप्पा मारतोय असं उत्तर काजोलला दिलं आहे.