बापरे! या देशात स्वतःच्या मर्जीने टीव्ही पाहिला तरी मिळते फाशी; 'हे' नियम ऐकून अंगावर येईल काटा

जगात एक असाही देश आहे जिथे लोक स्वतःच्या मर्जीने टीव्ही चॅनेल बदलू शकत नाहीत.

आपल्याला घरी बसून टीव्हीवर हवं ते चॅनेल पाहण्याचं स्वातंत्र्य असतं. पण जगात एक असाही देश आहे जिथे लोक स्वतःच्या मर्जीने टीव्ही चॅनेल बदलू शकत नाहीत. हा देश म्हणजे हुकूमशहा किम जोंग उनचा 'उत्तर कोरिया'. या देशात नागरिक काय पाहतील, काय ऐकतील आणि जगाकडे कोणत्या नजरेने बघतील, हे सर्व तिथले सरकार ठरवते. माहितीवर ताबा मिळवण्यासाठी उत्तर कोरियाने टेलिव्हिजनवर लावलेले निर्बंध अत्यंत थरकाप उडवणारे आहेत.

'लोकमत महाराष्ट्रीयन ऑफ द इयर' कोण?... क्लिक करून आपलं मत नोंदवा!

टीव्ही खरेदी केल्यावर आधी होतं रजिस्ट्रेशन

उत्तर कोरियात जेव्हा एखादा नागरिक टीव्ही खरेदी करतो, तेव्हा त्याला तो स्थानिक प्रशासनाकडे रजिस्टर करावा लागतो. सरकारी अधिकारी या टीव्ही सेटची तपासणी करतात आणि त्यातील चॅनेलच्या फ्रिक्वेन्सीला 'फिजिकल लॉक' लावतात. एवढ्यावरच न थांबता टीव्हीवर एक अधिकृत सरकारी स्टिकर किंवा सील लावले जाते. या प्रक्रियेमुळे त्या टीव्हीवर फक्त आणि फक्त सरकारी चॅनेलच दिसतात.

केवळ ४ चॅनेल आणि सरकारचीच स्तुती

या देशात सामान्यतः फक्त १ ते ४ सरकारी चॅनेल उपलब्ध असतात. यामध्ये 'कोरियन सेंट्रल टेलिव्हिजन' हे मुख्य चॅनेल आहे. या चॅनेलवर दिवसभर देशाच्या नेत्यांची स्तुती, सैन्याची कामगिरी आणि समाजवादी मूल्यांचा प्रचार केला जातो. जगातील बातम्या किंवा मनोरंजन चॅनेल पाहण्याचा तिथे कोणताही कायदेशीर मार्ग उपलब्ध नाही. नागरिकांना बाह्य जगापासून पूर्णपणे तोडून ठेवण्यासाठी हा खेळ रचला गेला आहे.

विदेशी चित्रपट पाहिला तर मरण अटळ!

जर कोणी चोरून विदेशी चित्रपट, विशेषतः दक्षिण कोरियाचे चित्रपट किंवा हॉलिवूड सिनेमे पाहताना आढळले, तर त्याला अत्यंत कठोर शिक्षा दिली जाते. तिथल्या 'रिएक्शनरी आयडॉलॉजी ॲन्ड कल्चरल रिजेक्शन' कायद्यानुसार, बंदी असलेले कंटेंट पाहणे किंवा ते इतरांना शेअर करणे हा मोठा गुन्हा मानला जातो. यासाठी अनेक वर्षे सक्त मजुरी किंवा अगदी मृत्यूदंडाची शिक्षाही सुनावली जाऊ शकते.

घराची कधीही होऊ शकते झडती

सरकारचे एजंट कधीही कुणाच्याही घरी जाऊन टीव्ही सेटची तपासणी करू शकतात. टीव्हीच्या लॉकशी छेडछाड झाली आहे का, हे तपासले जाते. जर सील तुटलेले आढळले, तर त्या कुटुंबावर मोठी कारवाई केली जाते. केवळ टीव्हीच नाही, तर रेडिओ आणि इंटरनेटवरही अशाच प्रकारचे कडक निर्बंध लावून उत्तर कोरियाने आपल्या देशाला जगासाठी एक बंदिस्त तुरुंग बनवले आहे.