एखाद्या व्यक्तीला कोणती सवय असेल सांगता येत नाही. एखाद्याला चांगली वाटणारी सवय दुसऱ्यासाठी त्रासदायक ठरू शकते. एका महिलेनं रेडइटवर याबद्दलचा एक किस्सा सांगितला आहे. या किस्सा महिलेच्या पतीबद्दल आहे. पतीच्या एका सवयीमुळे महिला प्रचंड वैतागली आहे. तिनं एका पोस्टच्या माध्यमातून तिच्यासोबत घडलेला संपूर्ण प्रसंग सांगितला आहे.
पती दिवसातले ४ तास स्वच्छतागृहात घालवत असल्याची व्यथा महिलेनं पोस्टमधून मांडली आहे. आम्ही नुकतंच हॉटेलमध्ये गेलो होतो. आपण आज घरी नाही. हॉटेलात आहोत, त्यामुळे लवकर ये असं मी नवऱ्याला स्वच्छतागृहात जात असताना सांगितलं. मात्र तरीही त्यानं तब्बल ४५ मिनिटं लावली. त्यामुळे प्रचंड राग आल्याचं महिलेनं पोस्टमध्ये सांगितलं आहे. नवऱ्याची सवय त्रासदायक ठरत असल्याचं तिनं पोस्टमध्ये म्हटलं आहे.
'आपण हॉटेलमध्ये असल्याची आठवण मी नवऱ्याला करून दिली होती. त्यावर त्यानं लवकर येतो असं उत्तर दिलं. मात्र बराच वेळ उलटून गेल्यानंतरही नवरा परत न आल्यानं मीच पुरुषांच्या स्वच्छतागृहात गेले. मी त्याला बाहेर येण्यास सांगितलं. काही सेकंदात बाहेर येतो असं उत्तर त्यानं दिलं. मात्र त्यानंतरही बराच वेळ मी त्याची वाट पाहिली. अखेर मी तिथून बाहेर पडले. हॉटेलमध्ये टेबलवर ठेवण्यात आलेलं जेवण संपवलं. वेटरला बिल निम्मं करण्यास सांगितलं. ते भरलं आणि तिथून निघून आले,' असा अनुभव महिलेनं शेअर केला आहे.
महिला टॅक्सीनं घरी पोहोचल्यानंतर २० मिनिटांनी तिचा पती घरी आला. तू अतिशय स्वार्थी आहेस. मला एकट्याला हॉटेलमध्ये ठेवून आलीस, असं म्हणत पतीनं हुज्जत घातली. त्यावर मी तुला फोन, मेसेज केले होते याची आठवण पत्नीनं करून दिली. महिलेनं सांगितलेला हा किस्सा सध्या सोशल मीडियावर चर्चेचा विषय ठरत आहे. अनेकांनी यावर प्रतिक्रिया दिल्या आहेत.