ऑनलाइन टीम
अमृतसर, दि. २०- पंजाबमधील ४० तरुण इराकमध्ये अडकले असतानाच या तरुणांना दुबईत नोकरीचे आश्वासन देऊन इराकमध्ये पाठवल्याची धक्कादायक बाब समोर आली आहे. भरघोस पगाराचे आमीष दाखवत इराकमध्ये पाठवण्याचे उद्योग उत्तर भारतात सुरु असून दुबई व अन्य गल्फ देशांपर्यंत या रॅकेटची पाळेमुळे रुजल्याचे समोर येत आहे.
इराकमधील मोसूल येथे बांधकाम साईटवर ४० कामगारांचे अपहरण झाले असून आणखी काही भारतीय इराकमध्ये अडकले आहे. अपह्रत भारतीयांमध्ये पंजाबमधील तरुणांचाही समावेश असून याच्य राज्यातील अन्य काही तरुणही इराकमध्ये आहेत. या तरुणांची फसवणूक करुन त्यांना इराकमध्ये पाठवण्यात येते अशी महिती आता समोर येत आहे. पंजाबसह उत्तर भारतातील काही राज्यांमध्ये परदेशात नोकरी मिळवून देणारे एजंट सक्रीय आहेत. इराकमधील अशांत वातावरणामुळे तिथे जाण्यास भारतातील तरुण तयार नसतात. त्यामुळे हे एजंट भारतीय तरुणांना दुबईमध्ये भरघोस पगाराचे आमीष दाखवतात असे सूत्रांनी सांगितले. टूरिस्ट व्हिसावर दुबईत गेल्यावर या तरुणांना अनेक दिवस कामच दिले जात नाही. शेवटी हे तरुण काम मिळवून देण्यासाठी दुबईतील एजंटकडे तगादा लावतात. त्यावेळी दुबईतील एजंट त्यांना दुबईत सध्या नोकरी उपलब्ध नसून इराकमध्ये नोकरी आहे असे सांगतो. नोकरीपायी भारतातून आलेले तरुण नाईलाजास्तवर इराकमध्येही काम करण्यास तयार होतात.
दुबईतून त्यांना अवैध मार्गाने कोणत्याही कागदपत्रांची पूर्तता न करता इराकमध्ये पाठवले जाते. यासाठी रस्ते किंवा सागरी मार्गाचा वापर होतो असे दुबईत कार्यरत असलेल्या एका समाजसेवी संस्थेचे प्रमुख एस. पी.ओबेरॉय यांनी सांगितले. या तरुणांना सांगितलेल्या पगारापेक्षा अर्धाच पगार हाती येतो असेही त्यांनी निदर्शनास आणून दिले. या रॅकेटचे पाळेमुळे पंजाबमधील गावागावापासून दुबई व इराकपर्यंत पोहोचले आहेत असेही जाणकार सांगतात.