जगातल्या कुठल्याही पुरुषाला विचारा, त्याच्या आयुष्यातल्या आत्यंतिक तणावाचे प्रसंग कुठले?, मैत्रिणीला गर्लफ्रेंड होण्यासाठी किंवा गर्लफ्रेंडला लग्नासाठी प्रपोज करणं हे त्यात कायम पहिल्या पाचात असणार. मैत्रीण कितीही जवळची असू दे, ती आपल्याला कितीही आवडत असू दे, तिलाही आपल्याबद्दल ‘तसंच’ वाटतं असं आपल्याला कितीही मित्रांनी सांगितलेलं असू दे, तिच्याही मनात ‘तेच’ आहे ही बातमी तिच्या मैत्रिणींकडून आपल्याला मिळालेली असू दे… तरीही… ॲक्च्युअल प्रपोज करण्याचं टेन्शन काही कमी होत नाही. आणि म्हणूनच, प्रपोज करण्याच्या आधी कितीही सेटिंग लावलेलं असू दे, प्रपोज करतांना काहीतरी स्पेशल करण्याचा बहुतेक सगळ्यांचा प्रयत्न असतो. पण, प्रपोज करणाऱ्या मुलींचं प्रमाण एकूणच नगण्य असल्याने बहुतेक वेळा हा भार मुलांच्या डोक्यावर असतो. त्यातून हिंदी सिनेमांनी हे प्रकरण अधिकच किचकट करुन टाकलेलं आहे. म्हणजे सामान्यांसाठी आयडिया देणं तर राहिलं दूरच; प्रपोज कसं करावं याची भीतीच मोठी !
मग कोणी हॉटेलमध्ये प्रपोज करतं, कोणी रोमँटिक माहोल तयार करून प्रपोज करतं, कोणी कॉलेजच्या पार्किंगमध्ये एका गुलाबाच्या फुलावर प्रपोज मारतं, तो नेमका क्षण पकडता यावा, निर्माण करता यावा म्हणून एखादी ट्रीप वगैरे ठरवतं .. काहीही असो, तू माझा / माझी होशील का, हा प्रश्न विचारणं आणि अपेक्षित उत्तर मिळणं हे सगळंच एकूण हृदयाची धडधड वाढवणारंच प्रकरण ! असाच एक जण त्याच्या गर्लफ्रेंडला आणि सोनी नावाच्या गोल्डन रिट्रिव्हर कुत्र्याला घेऊन एक दिवस बीचवर फिरायला गेला होता. त्याने अर्थातच त्याच्या गर्लफ्रेंडला सांगितलं असणार की, आपण नेहमीसारखे फक्त आऊटिंगला जातोय. तिथे गेल्यावर त्याने त्याच्या फोनचा व्हिडिओ रेकॉर्डर चालू केला आणि मैत्रिणीला मात्र सांगितलं की, आपल्याला एक सेल्फी घ्यायचा आहे. तिने सेल्फीसाठी पोझ घ्यायला सुरुवात केली आणि तेवढ्यात तो एका गुढग्यावर खाली बसला आणि त्याने तिला प्रपोज केलं.
कोणी म्हणेल की, यात एवढं भारी काय आहे?, ही आयडिया तर आत्तापर्यंत अनेक जणांनी वापरली असणार. पण, जगभरात सर्वत्र चर्चेचा विषय ठरलेल्या या इंस्टाग्राम स्टोरीमध्ये सगळ्यात भारी काय असेल तर, तो सोनी नावाचा कुत्रा ! त्याच्या मालकाने आपल्या गर्लफ्रेंडला प्रपोज केल्याबरोबर त्याने आत्यंतिक आनंदाने सुसाट पळायला आणि उड्या मारायला सुरुवात केली. अर्थातच हे त्याने समजून केलेलं असण्याची शक्यता अगदीच नगण्य आहे. पण, व्हिडिओ बघताना मात्र असं वाटतं, की जणू काही सोनी त्या प्रपोज करण्याच्या घटनेने सॉलिड खूश झाला असावा. त्या माणसाच्या गर्लफ्रेंडने त्याला होकार दिला ही, त्या व्हिडिओतली अजून एक जमेची बाजू झाली. पण, लोकांना मुख्यतः तो व्हिडिओ आवडला आहे तो, त्यातील सोनीच्या प्रतिक्रियेमुळे. कदाचित असं असावं, की ज्या अर्थी कुत्रा एवढा खूश झाला आहे त्याअर्थी हे नातं छान असेल असं तो व्हिडिओ बघताना लोकांना वाटलं असेल.
कारण माणसं एकमेकांशी खोटं वागतात आणि एकमेकांच्या खोट्या वागण्याला फसतात. पण, कुत्री कधीच खोटं वागत नाहीत आणि सामान्यतः माणसांच्या खोटं वागण्याने फसतही नाहीत. सोनीला जर, का त्याच्या मालकाची गर्लफ्रेंड पटली नसती, त्याच्या मते जर का ती खोटं वागणारी बाई असती, तर त्याने तिला मुळात स्वीकारलंच नसतं. हे कुत्रं आवडणाऱ्या आणि न आवडणाऱ्या देखील माणसांना माहिती असतं. आणि म्हणूनच कुत्र्याने आनंद व्यक्त केला त्याअर्थी ह्या नात्यात पुढे सगळं छान होईल असं लोकांना सुप्त मनात वाटलं असावं. एकूणच कुत्री, मांजरं आणि इतर पाळीव प्राण्यांना असलेल्या उपजत शहाणपणाच्या कथा सगळ्यांनीच कायम ऐकलेल्या असतात. काही जणांनी त्या प्रत्यक्ष अनुभवलेल्या असतात. बाल्कनीत घरातला लहान मुलगा चालत आला, तर त्याला कठड्याच्या जवळ येऊ न देणारं मांजर, गावाला गेलेल्या मालकाची वाट बघत वैरणीतली एक काडीही न खाणारी गाय, स्वतःच्या जीवावर उदार होऊन घरातल्या माणसांचं रक्षण करणारी कुत्री या गोष्टी आपण अनुभवलेल्या असतात. प्राण्यांच्या भावविश्वातली ही निरागसता अनेकदा थक्क करणारी असते.त्यामुळेच सगळ्या सोशल मीडियावरती पाळीव प्राण्यांचे आणि लहान बाळांचे व्हिडिओज सगळ्यात जास्त भाव खाऊन जातात. कारण सोशल मीडियावरच्या सततच्या वाईट बातम्या, आपल्याच जवळच्या माणसांनी एकमेकांवर केलेल्या राजकीय विचारसरणीच्या कुरघोड्या आणि एकूणच सतत आजूबाजूला असलेलं नकारात्मक आणि द्वेषाने भरलेलं वातावरण यात सगळ्यात नितळ म्हणावं असं प्रेम तिथेच तर दिसतं !
‘गुडन्यूज डॉग’वरची प्रेमकहाणी आता या सोनी नावाच्या कुत्र्याच्या मालकाचं आणि त्याच्या गर्लफ्रेंडचं नाव काय, याचा काहीही तपशील या व्हायरल व्हिडिओत नाही.. पण, तीच तर त्याची गंमत आहे. गुडन्यूजडॉग नावाच्या इंस्टाग्राम हॅन्डल वरची ही ‘झुमी’ जगभरातल्या अनेकांच्या आनंदाचं कारण ठरली आहे, हे मात्र नक्की !