गुजरातच्या बडोद्यामध्ये विश्वास बसणार नाही असे प्रकरण समोर आले आहे. एका महिलेने लग्नाच्या सहा वर्षांनी तिचा जो पती आहे तो महिलाच होता असा दावा केला आहे. तिच्या हाती पतीची एक वैद्यकीय फाईल लागली आहे, तेव्हा तिचा पती लग्नाआधी मुलगी होता असे तिला समजले आहे. या साऱ्या प्रकारामुळे महिलेला धक्का बसला आहे.
तिच्या पतीने लिंगपरिवर्तन करून लग्न केले होते. तसेच ही बाब त्याने तिच्यापासून लपविली होती. एका मॅट्रीमोनिअल साईटवर या दोघांची ओळख झाली होती. यानंतर दोघांचे जुळल्याने त्यांनी लग्न केले, हनिमूनला देखील जाऊन आले. तेव्हा त्या महिलेच्या काहीच लक्षात आले नाही. आता सहा वर्षांनी तिच्या हाती पतीची मेडिकल फाईल लागली आणि बिंग फुटले आहे.
बडोद्यातील वकील सिद्धार्थ पवार यांनी या विचित्र प्रकरणाची माहिती दिली आहे. पीडित महिलेच्या वतीने पवार हे खटला लढवित आहेत. या महिलेने तिच्या या दिल्लीतील डॉक्टर पतीविरोधात गुन्हा दाखल केला आहे. महिलेच्या पहिल्या पतीचे निधन झाले होते. तिला एक लहान मुलगी देखील होती. यामुळे तिला पुन्हा लग्न करायचे होते. त्याच वेळी तिची मॅट्रिमोनियल साइटवर दिल्लीतील एका मुलाशी भेट झाली. मुलाने सांगितले की तो डॉक्टर आहे.
यानंतर दोघांचे लग्न झाले आणि ती महिला आपल्या मुलासह त्याच्यासोबत राहू लागली. लग्नानंतर दोघेही हनिमूनला काश्मीरला गेले होते, मात्र मुलाने आजारी आणि अॅलर्जी असल्याचे सांगून अंतर ठेवले. ही महिला जेव्हाही त्याच्या जवळ जायची तेव्हा तो कोणत्या ना कोणत्या कारणाने तिला दूर ठेवत असे. लग्नानंतर चार वर्षांनी या डॉक्टर नवऱ्याने आपल्याला एक ऑपरेशन करायचे आहे असे सांगितले. यासाठी तो कोलकाताला गेला.
यानंतर दोन वर्षांनी पत्नीच्या हाती त्याची सिक्रेट फाईल लागली. फाईल बघताच तिचे डोळे पांढरे झाले. ती ज्याच्याशी लग्न करून सहा वर्षांपासून राहत होती, ती मुलगीच होती. तिने लिंगपरिवर्तन करून आपल्याला फसविले आहे. यानंतर महिलेने तिच्या पतीविरुद्ध (जो आधी मुलगी होता) एफआयआर दाखल केला आहे. शरीराच्या वरच्या भागावर शस्त्रक्रिया केल्याने तो मुलासारखा दिसत होता. कोरोनाच्या काळात त्याच्या शरीराच्या खालच्या भागावर शस्त्रक्रिया कोलकात्यात झाली.