जळगाव : पायी जात असलेल्या महिलेला रिक्षाचालकाने कट मारला. त्याचा जाब विचारल्याचा राग येऊन रिक्षाचालकाने महिलेच्या डोक्यात लोखंडी पाईप मारीत जखमी केल्याची घटना शिवाजीनगरील हुडको परिसरात घडली. सुवर्णा गणेश सोनवणे (४२, रा़ शिवाजीनगर हुडको) असे जखमी महिलेचे नाव असून, याप्रकरणी शहर पोलीस ठाण्यात गुन्हा दाखल करण्यात आला आहे.
शिवाजीनगर हुडको परिसरातील रहिवासी सुवर्णा गणेश सोनवणे या गुरुवारी सायंकाळी सव्वासहा वाजेच्या सुमारास रस्त्याने पायी जात होत्या. त्यावेळी पिंटू सोमन्ना कोळी याने त्यांना रिक्षाचा कट मारला. कट का मारला, असा जाब सोनवणे यांनी त्यास विचारला. याचा राग आल्याने पिंटू कोळी याने सोनवणे यांना शिवीगाळ करीत चापटा बुक्क्यांनी मारहाण केली. नंतर त्याने त्याच्या हातातील लोखंडी पाईप डोक्यात मारून त्यांना जखमी केले. याप्रकरणी शहर पोलीस ठाण्यात महिलेच्या तक्रारीवरून रिक्षाचालकाविरुद्ध गुन्हा दाखल करण्यात आला आहे.