फोटो
जळगाव : मित्राच्या भेटीला जाणाऱ्या विकास भास्कर पाटील (वय ४२, रा.शिवदत्त कॉलनी, जळगाव, मुळ रा.सनफुले, ता.चोपडा) यांच्या दुचाकीला भरधाव वेगाने जाणाऱ्या वाहनाने उडविले, त्यात त्यांचा जागीच मृत्यू झाला. ही घटना मंगळवारी दुपारी साडेबारा वाजता पाळधी, ता.धरणगाव येथील महामार्गावर घडली.
चोपडा तालुक्यातील सनपुले येथील मुळ रहिवासी असलेले विकास पाटील हे नोकरीच्या निमित्ताने पाच वर्षांपूर्वी जळगाव शहरातील चंदूअण्णा नगर परिसरातील शिवदत्त कॉलनी येथे स्थायिक झाले होते. एमआयडीसीतील सिद्धार्थ कार्बो या कंपनीत ते कामाला होते. मंगळवारी सकाळी ११.३० वाजण्याच्या सुमारास विकास पाटील हे बँकेच्या कामानिमित्ताने घराबाहेर पडले. बँकेत काम आटोपून ते दुचाकीने (क्र.एम.एच.१ सी.एल.१८९०) कंपनीतील मित्राला भेटण्यासाठी पाळधीकडे जात होते. तत्पूर्वी त्यांनी पेट्रोलपंपावर दुचाकीत पेट्रोल भरले. पाळधी गावातील साईबाबा मंदिरासमोर महामार्गावर १२.३० वाजता एका भरधाव वाहनाने विकास पाटील यांना चिरडले.
वाहन चालक फरार
अपघातानंतर वाहन चालक पसार झाला होता. दरम्यान, अपघात झाल्याचे लक्षात येताच, नागरिकांनी घटनास्थळी धाव घेतली. विकास पाटील यांच्या कुटुंबीयांना माहिती कळविण्यात येऊन त्यांना जिल्हा रुग्णालयात हलविण्यात आले. वैद्यकीय अधिकार्यांनी त्यांना मृत घोषित केले. जिल्हापेठ पोलीस ठाण्याचे पोलीस कर्मचारी पोलीस नाईक संदीप पाटील व पोलीस कॉन्स्टेबल प्रदीप पाटील यांनी पंचनामा केला. जिल्हापेठ पोलीस ठाण्यात याबाबत नोंद करण्यात येऊन शून्य क्रमांकाने हा गुन्हा पाळधी पोलिसात वर्ग केला जाणार आहे. पाटील यांच्यापश्चात पत्नी पुष्पांजली, मुलगा तेजस व मुलगी स्नेहल असा परिवार आहे. तेजस याचे शिक्षण पूर्ण झाले असून, तो खासगी कंपनीत नोकरी करतो, तर स्नेहल ही बारावीला शिक्षण घेत आहे. घटनेची माहिती मिळाल्यावर सनफुले येथील नातेवाइकांनीही जिल्हा रुग्णालयात गर्दी केली होती.