जळगाव : मजुरांना पाणी घेऊन जात असताना मागून भरधाव येणाऱ्या कारने जोरदार धडक दिल्याने दुचाकीस्वार शेतकरी जागीच ठार झाल्याची घटना गुरुवारी सकाळी ८ वाजेच्या सुमारास विटनेर-नेरी रस्त्यावर घडली. संतोष दशरथ पाटील (४८, रा. विटनेर) असे मयत शेतकऱ्याचे नाव आहे.
विटनेर येथे संतोष दशरथ पाटील हे कुटुंबीयांसह वास्तव्यास होते. त्यांचे विटनेर शिवारातच शेत असल्यामुळे ते रोज दुचाकीने ये-जा करीत होते. या शेतात कापूस वेचण्यासाठी शेतमजूर रोजंदारीने लावले होते. गुरुवारी सकाळी ८ वाजेच्या सुमारास ते दुचाकीने (क्र. एमएच १९ एझेड ४३७७) मजुरांना शेतात पाणी घेऊन जात होते. त्याचवेळी मागून एरंडोलकडे भरधाव वेगाने जाणाऱ्या कारने (एमएच १९ सीएच २३३३) त्यांच्या दुचाकीस मागून जोरदार धडक दिली.
धडक बसताच ३० फूट दूर फेकले गेले
कारची मागून धडक बसताच दुचाकीस्वार शेतकरी संतोष पाटील हे ३० फूट फेकले गेले. यात त्यांच्या डोक्याला जबर मार बसला आणि त्यांचा जागीच मृत्यू झाला, तर कार उलटी झाली. कारचालकाने सिटबेल्ट लावले असल्याने एअरबॅग उघडल्या, यात चालक बचावला. दरम्यान, घटनास्थळाहून कार चालक फरार झाला आहे. मयत संतोष पाटील यांचा मृतदेह जिल्हा जिल्हा रुग्णालयात सकाळी शवविच्छेदनासाठी आणण्यात आला होता. यावेळी नातेवाइकांची गर्दी झाली होती, दरम्यान, याप्रकरणी संतोष पाटील यांच्या मृत्यूस कारणीभूत ठरलेल्या कारचालकाविरुद्ध सुरेश अशोक पाटील यांच्या फिर्यादीवरून गुन्हा दाखल करण्यात आला आहे.