दुसरीकडे वाळू वाहतूक करणाऱ्या माफियांची टोळी आणि महसूल कर्मचाऱ्यांदरम्यान कथितरित्या पार पडलेल्या बैठकीत हप्ता ठरवून दिल्यानंतरही ट्रॅक्टर पकडले गेल्याने उद्भवलेल्या वादातून कथित ऑडिओ क्लिप व्हायरल झाल्याची दबक्या आवाजात चर्चा आहे.
वाळू माफियासोबत तलाठ्याच्या संबंधाची क्लीप व्हायरलबाबत ‘लोकमत’मध्ये वृत्त प्रकाशित झाल्यानंतर महसूल विभागात खळबळ उडाली. शुक्रवारीच प्रांताधिकारी यांनी मुक्ताईनगर येथे भेट देऊन याबाबत चौकशी केली तर सायंकाळी उशिरा वडोदा तलाठी जयेश जगदीश सुरवाडे यास निलंबित केल्याचा मेल तहसीलदार कार्यालयात धडकला; मात्र शनिवार, रविवार सुटी असल्याने सोमवारी निलंबनाची अधिकृत माहिती समोर आली. सेवा शिस्तीचा भंग केल्याचा ठपका निलंबन आदेशात देण्यात आला आहे.
संबंधांबाबत चर्चा
गेल्या अनेक दिवसांपासून महसूल कर्मचारी आणि वाळू तस्कर यांच्यातील संबंधाची दबक्या आवाजातील चर्चा व्हायरल क्लीपच्या माध्यमातून उघड झाली असतांना आता अनेक किस्से सामोर येऊ लागले आहे. यात अधिकाऱ्यांच्या मर्जीतील एक तलाठी व त्याचे दोन सहकारी तालुक्यातील वाळू प्रकरण हाताळत होते सुरुवातीला वाळू ट्रॅक्टर पकडून त्यांच्याकडून जागेवरच अर्धे दंडाच्या नावाखाली ६२ हजार रुपये घेऊन ट्रॅक्टर सोडण्याचा प्रकार सुरू झाला. सुमारे ३० ते ३५ वाळू ट्रॅक्टरधारकांनी मार्ग शाेधला. याच्यावर तोडगा काढण्यासाठी वाळू माफिया आणि महसूल कर्मचारी यांच्यात छुपी बैठक पार पडली. यात प्रत्येक ट्रॅक्टरमागे १२ हजार रुपये हप्ता ठरला असल्याचे चर्चा आहे. आता हप्ता ठरल्यानंतरही ट्रॅक्टर पकडले गेल्याने उदभवलेल्या वादातून वाळू तस्कराने ऑडिओ क्लिप व्हायरल करून हा प्रकार चव्हाट्यावर आणला.
प्रांत कर्मचारी
दरम्यान, भुसावळ प्रांत कार्यालयात कार्यरत एक जोडपे खासगी वाहनाने अधूनमधून मुक्ताईनगर तालुक्यातील पूरनाड फाटा, अंतुर्ली पिंप्रीनांदू परिसरात फिरतात आणि वाळू तस्करी करणारे ट्रॅक्टर पकडून रकमा उकळत असल्याचा प्रकार सर्रास करीत आहेत. गेल्याच पंधरवड्यात ही बोंब फुटली होती. त्याची चर्चा थांबत नाही तोच आता वाळू माफियांना महसूल विभागाचे लागेबांधे हळूहळू समोर येत आहे.
चोर सोडून इतरांचा बळी नको
महसूल आणि वाळू तस्करांचे संबंध उघडे पडल्यानंतर आता कारवाईचे सत्र सुरू होण्याचे भाकीत कर्मचारी वर्तवित आहे. वाळू माफियांशी साटेलोटे व व्यवहार करणारे कर्मचारी वरिष्ठांच्या मर्जीतील आहे. यामुळे त्यांना वाचविण्यासाठी इतरांचा बळी जायला नको, अशी चर्चा महसूल कर्मचाऱ्यांमध्ये सुरू आहे.