कजगाव, ता. भडगाव : कजगाव ग्रामपंचायत सभागृहात कोविड नियमांचे पालन करून झालेल्या कार्यशाळेत खरीप हंगामात जैविक व रासायनिक बीज प्रक्रिया करूनच पेरणी करण्याचे आवाहन कृषी विभागामार्फत शेतकऱ्यांना करण्यात आले.
या कार्यक्रमात घरचे बियाणे उगवण क्षमता व बीजप्रक्रियाचे प्रात्यक्षिक दाखविण्यात आले. रासायनिक खतांचा वापर कमी करून खर्चात बचत करणे, बीजप्रक्रियेसाठी पी. एस. बी., अझेटोबॅक्टर, रायझोबियम, रासायनिक औषधांच्या वापराचे महत्त्व पटवून देण्यात आले. जमीन सुपीकता निर्देशांकाचे वाचन करण्यात येऊन फर्टिलायझर कॅल्क्युलेटर ॲपचा वापर शेतकऱ्यांनी करावा, कडधान्य व तृणधान्य पिकानंतर कापूस पिकाची लागवड तांत्रिकदृष्ट्या फायदेशीर ठरते. कंपोस्ट खत, गांडूळ खत, सेंद्रिय खत, हिरवळीच्या खताचा वापर जास्तीत जास्त करून पिकांची फेरपालट, आंतरपीक, मिश्रपीक पद्धती, मूलस्थानी जलसंधारण, सफळा पिकांचा वापर, रुंद सरी वरंबा (बी.बी.एफ.) यंत्राने पेरणी व जैविक कीड व रोग व्यवस्थापन इत्यादीबाबत बैठकीत चर्चा करण्यात आली.
कृषीविषयक माहिती शेतकऱ्यांना सोशल मीडियाद्वारे पुरविण्यात आली. कार्यशाळेच्या अध्यक्षस्थानी ग्रा. पं. सदस्य आनंदा महाजन, एन. एस. महाजन व शेतकरी उपस्थित होते. यशस्वीतेसाठी इनोरा बायो कंपनीचे नीलेश पाटील व कृषी सहायक अनिल तायडे यांचे सहकार्य लाभले.