लोकमत न्यूज नेटवर्क
जळगाव : सावत्र बापाने २० वर्षीय उच्चशिक्षित मुलीवर अत्याचार केल्याची धक्कादायक घटना उघडकीस आली असून, संशयितास गुरुवारी अटक करण्यात आली आहे. वारंवारच्या त्रासामुळे पीडितेने घर सोडत पुण्याला रवाना झाली. त्याठिकाणी सावत्र बापाविरुद्ध गुन्हा दाखल केला. त्यानंतर याप्रकरणी रामानंद नगर पोलीस ठाण्यात गुन्हा वर्ग झाला आहे.
सूत्रांनी दिलेल्या माहितीनुसार, रामानंदनगर पोलीस ठाण्याच्या हद्दीत राहणारी २० वर्षीय तरुणी बीसीएच्या द्वितीय वर्षाला शिक्षण घेत आहे. २३ जानेवारी २०१४ रोजी पीडित मुलीच्या आईचा दुसरा विवाह झाला. त्यावेळी पीडिता १३ वर्षांची होती. आई,वडील, आजी-आजोबा व लहान बहीण असे एकत्र एकाच घरात वास्तव्य करीत होते. त्यानंतर दोन वर्षांनी सावत्र बाप मुलीला वाईट अर्थाने स्पर्श करू लागला. त्याकडे मुलीने दुर्लक्ष केले. एक-दोन वेळा झाल्यानंतर मुलीने नकार दिला असता चुकून झाले असे तो सांगायचा.
वाढदिवसाच्याच दिवशी अत्याचार
१७ फेब्रुवारी २०१९ रोजी पीडितेचा वाढदिवस होता. त्यादिवशी पीडितेची आई लहान बहिणीला घेऊन स्विमिंगला गेली होती. त्यावेळी पीडिता, आजी- आजोबा व सावत्र बाप असे घरी होते. आजी, आजोबा दुसऱ्या खोलीत असताना सावत्र बापाने जबरदस्ती शारीरिक संबंध केले. ही गोष्ट कोणाला सांगितली तर तुझ्या आई व बहिणीला जीवे ठार मारून टाकेल, अशी धमकी दिली. सप्टेंबर २०१९ मध्ये पोटात दुखायला लागल्याने आई-वडील हे स्त्रीरोग तज्ज्ञाकडे घेऊन गेले होते. त्यानंतर जानेवारी महिन्यात पीडितेची आई घरी नसताना तसेच आई झोपेत असताना सावत्र बापाने पुन्हा जबरदस्तीने शारीरिक संबंध केले. त्यावेळीदेखील आईला मारण्याची धमकी देण्यात आली. या भीतीने रात्री झोपताना पीडिता आईजवळ जायला लागली असता मुलगी आपल्यात फूट पाडत असल्याचे पत्नीला त्याने सांगितले.
आईच्या लग्नाच्या वाढदिवशी झाला प्रकार उघड
२३ जानेवारी रोजी पीडितेच्या आईच्या लग्नाचा वाढदिवस होता. त्यादिवशी सर्वजण झोपले असता मध्यरात्री २ वाजता उठून सावत्र बापाने पुन्हा अत्याचार केला. तेव्हा आईला जाग आली असता तिने वडिलांच्या कानशिलात लगावली. या घटनेनंतर दुसऱ्या दिवशी आईने मुलीला पुणे येथे आपल्या माहेरी पाठवून दिले. तेथे असतानाही वडील मोबाइलवर अश्लील संदेश पाठवायचे. या प्रकाराने त्रस्त झालेल्या पीडितेने पुण्यातील समुपदेशकाची भेट घेतली. झालेला प्रकार त्यांच्याकडे कथन केला. त्यांनी तिला घेऊन पिंपरी-चिंचवड पोलीस ठाणे गाठले. तेथे सावत्र बापाविरुद्ध बलात्काराचा गुन्हा दाखल करण्यात आला. या गुन्ह्यात मदत करणारी सावत्र बापाच्या आईलाही सहआरोपी करण्यात आले आहे. हा गुन्हा गुरुवारी रामानंद नगर पोलीस ठाण्यात वर्ग करण्यात आला. दरम्यान, त्यानंतर पोलिसांनी संशयित बापाला अटक केली. त्याला दुपारी न्यायालयात हजर केले असता ८ जूनपर्यंत पोलीस कोठडी सुनावली. सरकारतर्फे सहायक सरकारी वकील नीलेश चौधरी यांनी बाजू मांडली.