सूत्रांनी दिलेल्या माहितीनुसार, हर्षल आठवीच्या वर्गात शिक्षण घेत होता. कोरोनामुळे लॉकडाऊन सुरू झाल्याने चार महिन्यांपासून तो तुकारामवाडीतील मामा दीपक भदाणे यांच्याकडे आलेला होता. त्यांचा कपडे इस्त्रीचा व्यवसाय आहे. मंगळवारी ते कामानिमित्ताने घराबाहेर होते तर हर्षल व त्याची आजी प्रमिलाबाई हे दोघेच घरी होते. दुपारी दोन वाजेच्या सुमारास आजी कामानिमित्ताने दुकानवर गेली. तेथून परत आल्यावर बाथरूममध्ये हर्षल हा साडीने गळफास घेतलेल्या अवस्थेत दिसून आला. नातेवाइकांनी तातडीने हर्षलला खासगी रुग्णालयात नेले, नंतर तेथून जिल्हा रुग्णालयात हलविले. तेथे वैद्यकीय अधिकाऱ्यांनी मृत घोषित केले. घटनेची माहिती मिळाल्यावर एमआयडीसी पोलीस स्टेशनचे उपनिरीक्षक विशाल सोनवणे तसेच कर्मचाऱ्यांनी घटनास्थळ गाठले. पंचनामा व शवविच्छेदनानंतर मृतदेह नातेवाइकांच्या ताब्यात दिला.
‘डेथ इन क्लॉक’ ही वेबसाइट
हर्षल याच्याकडे मोबाइल होता. या मोबाइलमध्ये त्याने ‘द डेथ इन क्लॉक’ ही वेबसाइट बघितली, त्यात मृत्यू कधी होणार म्हणून स्वतःची जन्मतारीख टाकलेली दिसून आली. यानंतरही त्याने यू ट्यूबसह अनेक वेबसाइट ओपन केल्याचे दिसून आले. आजी काही वेळासाठी बाहेर जाताच हर्षलने मोबाइलमध्ये बघितल्याप्रमाणे बाथरूममध्ये जाऊन गळफास घेतला.
बालहट्टामुळे घेतलेला मोबाइलच ठरला घातक
मयत हर्षल याच्या पश्चात वडील दीपक कुंवर, आई कविता व बहीण कोमल असा परिवार आहे. दीपकच्या वडिलांचा शिंदखेडा येथे कपडे इस्त्री करण्याचा व्यवसाय आहे. हलाखीची परिस्थिती असल्याने हर्षलची आई भाजीपाला विक्रीचा व्यवसाय करून उदरनिर्वाहास मदत करते. एकुलत्या एका हर्षलच्या हट्टापायी तिने त्याला पैसे नसल्याने हप्त्यांवर पैसे परतफेडीच्या हिशेबाने काही दिवसांपूर्वीच १५ हजार रुपयांचा नवीन मोबाइल खरेदी करून दिला होता. मोबाइलचा हट्टच आणि हा मोबाइलच मुलाच्या मृत्यूस कारणीभूत ठरला आहे. तिचा जिल्हा रुग्णालयातील मन हेलावणारा आक्रोश पाहून अनेकांना अश्रू अनावर झाले होते. याप्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली आहे. प्राथमिक तपास पोलीस उपनिरीक्षक विशाल सोनवणे करीत आहेत. चौकशीत त्यांनी मुलाकडील मोबाइल जप्त केला आहे.