विलास बारी
जळगाव : एमआयडीसी भागात एम सेक्टरमधील कंपनीत माल उतरविण्यासाठी आलेला ट्रक मागे घेत असताना सुरक्षा रक्षकाला धडक लागली. यामध्ये ते गंभीर जखमी झाले, उपचारादरम्यान त्यांचा मृत्यू झाल्याची घटना गुरुवारी दुपारी घडली.
सुकदेव आनंदा सापकर (वय ६५, रा. तुळजाईनगर कुसुंबा) असे मृत झालेल्या सुरक्षा रक्षकाचे नाव आहे.याप्रकरणी ट्रकचालकाविरुद्ध एमआयडीसी पोलिसात गुन्हा दाखल करण्यात आला आहे.जळगाव तालुक्यातील कुसुंबा येथे सुकदेव सापकर हे वास्तव्यास असून ते एमआयडीसीतील एम सेक्टरमधील जीबी इंडस्ट्रीजमध्ये सुरक्षा रक्षक म्हणून नोकरी करीत होते. कंपनीत (एमएच २८ बीबी of५३९९) क्रमांकाच ट्रक माल उतरविण्यासाठी आला होता.
ट्रक चालक हा ट्रक मागे घेत असतांना कंपनीच्या गेटवर ड्युटी करीत असलेल्या सापकर यांना ट्रकची धडक लागल्याने ते गंभीर जखमी झाले. दरम्यान, कामगारांनी त्यांना तात्काळ खासगी रुग्णालयात दाखल केले. याठिकाणी त्यांच्यावर उपचार सुरु असतांना सायंकाळी ६ वाजेच्या सुमारास सापकर यांची प्राणज्योत मालवली.