जळगाव : भुसावळ येथील जमिनीच्या ले-आऊट मंजुरीसाठी ६0 लाखांची खंडणी घेतल्याप्रकरणी दाखल गुन्ह्यात माजी आमदार संतोष चौधरी यांना झालेल्या शिक्षेला स्थगिती मिळावी यासाठी त्यांनी अतिरिक्त सत्र न्यायाधीश एन.आर.क्षीरसागर यांच्या कोर्टात अर्ज दाखल केला आहे. आपल्याला विधानसभा निवडणूक लढवायची असल्याचे संतोष चौधरी यांनी या अर्जात नमूद केले आहे.
बांधकाम व्यावसायिक चंद्रशेखर अत्तरदे यांनी माजी आमदार संतोष चौधरी यांच्या विरोधात ६0 लाखांच्या खंडणीची फिर्याद दिली होती. पोलिसांनी त्यांना अटक केल्यानंतर तब्बल दोन वर्षांपेक्षा जास्त काळ चौधरी हे कारागृहात होते. या प्रकरणात न्यायालयाने चौधरी शिक्षा सुनावली होती. या शिक्षेला चौधरी यांनी जिल्हा न्यायालयात आव्हान दिले होते.
मंगळवारी अँड.सागर चित्रे यांनी संतोष चौधरी यांच्यातर्फे युक्तीवाद केला. आपल्याला आगामी विधानसभा निवडणूक लढवायची असल्याचे सांगत प्रथमवर्ग न्यायदंडाधिकार्यांनी दिलेल्या शिक्षेला स्थगिती मिळावी अशी विनंती त्यांनी केली. यावेळी त्यांनी विविध न्यायालयातील दाखले सादर केले. न्यायालयाने युक्तीवाद ऐकून घेतला. चौधरी यांच्या अर्जावर आता २५ रोजी कामकाज होणार आहे, अशी माहिती मिळाली.न्यायालय काय निर्णय देते याकडे लक्ष लागून आहे.
कलम ३८९ अन्वये दिला अर्ज
सध्या विधानसभा निवडणुकीच्या उमेदवारी अर्जाची प्रक्रिया सुरू झाली आहे. निवडणुकीसाठी संतोष चौधरी हे इच्छुक आहेत. एखाद्या प्रकरणात शिक्षा झाली असल्यास त्यात 'स्टे ऑन कनव्हीक्शन' चा आदेश आवश्यक असतो. त्यामुळे सोमवारी चौधरी यांनी फौजदारी दंड संहिता कलम ३८९ प्रमाणे खालच्या न्यायालयाने दिलेल्या शिक्षेला स्थगिती मिळावी यासाठी अँड.सागर चित्रे यांच्यामार्फत अतिरिक्त सत्र न्यायाधीश एन.आर.क्षीरसागर यांच्या कोर्टात अर्ज दाखल केला.