लोकमत न्यूज नेटवर्क
जळगाव : दारू पिण्यासाठी पैसे न दिल्याचा राग येऊन एकाने रिक्षाचालक मोहसीन बेग अफसर बेग (२९, रा. गेंदालाल मिल) यांच्या डोक्यात फरशी मारून गंभीर जखमी केल्याची घटना गुरुवारी रात्री १२.३० वाजता गेंदालाल मिल भागात घडली. याप्रकरणी शहर पोलीस ठाण्‍यात गुन्हा दाखल करण्‍यात आला आहे.
गेंदालाल मिल येथे मोहसीन बेग हे कुटुंबीयांसह वास्तव्यास आहेत. रिक्षा चालवून कुटुंबीयांचा उदरनिर्वाह करतात. गुरुवारी रात्री प्रवाश्यांना सोडून ते घरी परतले. रिक्षा घराजवळ उभी करून घराकडे जात असताना, त्यांना वाटतेचं फिरोज शहा याने अडविले व दारू पिण्यासाठी पैशांची मागणी केली. बेग यांनी पैसे नसल्याचे त्यास सांगितले. याचा राग येऊन त्याने बेग यांना बेदम मारहाण केली. नंतर जवळच असलेली फरशी उचलून ती बेग यांच्या डोक्यात तीन वेळा मारली. त्यामुळे डोक्यातून प्रचंड रक्तस्त्राव होऊन ते गंभीर जखमी झाले. नंतर कुटुंबीयांनी त्यांना रुग्णालयात उपचारार्थ दाखल केले. पोलिसांनी घेतलेल्या जबाबावरून शहर पोलीस ठाण्‍यात फिरोज शहा (रा.गेंदालाल मिल) याच्याविरुध्‍द गुन्हा दाखल करण्‍यात आला आहे. दरम्यान, त्यांना मारहाण होत असताना त्यांच्या खिशातील बारा हजार रुपये गायब झाल्याचे तक्रारीत म्हटले आहे.