लोकमत न्यूज नेटवर्क
जळगाव : जिल्हा मेडिसिन डीलर असोसिएशनच्या अध्यक्षपदी सुनील भंगाळे यांची सर्वानुमते सातव्यांदा निवड झाली आहे. मंगळवारी झालेल्या कार्यकारिणीच्या बैठकीत त्यांच्यासह सचिव म्हणून अनिल झंवर व कोषाध्यक्ष म्हणून श्याम वाणी यांचीही बिनविरोध निवड करण्यात आली. उर्वरित कार्यकारिणी निवडण्याचे त्यांना अधिकार देण्यात आले असून, येत्या आठवडाभरात सभा घेऊन कार्यकारिणी निवडण्यात येणार असल्याची माहिती अध्यक्ष सुनील भंगाळे यांनी दिली.
केमिस्ट भवनात संघटनेची सकाळी ११ ते ३ वाजेपर्यंत बैठक पार पडली. घटनेप्रमाणे कार्यकारिणीचा कार्यकाळ पूर्ण झाल्याने सिलेक्शन किंवा इलेक्शन या दोन मुद्द्यांवर चर्चा करण्यासाठी या बैठकीचे आयोजन करण्यात आले होते. मात्र, सर्वानुमते निवड प्रक्रिया पार पडल्याने निवडणूक प्रक्रिया टळली. यात सुनील भंगाळे यांची सातव्यांदा अध्यक्ष म्हणून निवड झाली आहे. ही निवड पुढील तीन वर्षांसाठी राहणार आहे. बैठकीला एक हजारांवर केमिस्ट बांधव उपस्थित होते. दरम्यान, आगामी कार्यकारिणीत कनकमल राका आणि संजीव नारखेडे यांच्यासह काही जुने पदाधिकारी असतील. २१ दिवसांनी संघटनेची वार्षिक सभा घेण्यात येणार असल्याचीही त्यांनी माहिती दिली.