जळगाव : दिल्ली येथे शेतकरी बांधवांतर्फे कृषी कायद्यांविरोधात सुरू असलेल्या आंदोलनाच्या ठिकाणी २६ जानेवारी रोजी दिल्ली पोलिसांनी लाठीहल्ला केला. या प्रकरणी सेंटर फॉर इंडियन ट्रेड युनियन सीटूतर्फे शनिवारी जिल्हाधिकाऱ्यांना निवेदन देऊन निषेध नोंदविण्यात आला. यावेळी प्रदीप वाणी, ज्ञानेश्वर इंगळे, प्रवीण चौधरी, विलास सोनवणे, विजय पवार आदी पदाधिकारी उपस्थित होते.
मालमत्ता कराच्या भरण्यासाठी गर्दी
जळगाव : थकीत मालमत्ता धारकांना ३१ जानेवारीपर्यंत भरणा केल्यास शास्तीवर ७५ टक्के सूट देण्यात आली आहे. या शास्ती अभय योजनेचा लाभ जास्तीत जास्त नागरिकांना होण्यासाठी सुटीच्या दिवशीही सर्व प्रभाग समिती कार्यालये सकाळी १० ते दुपारी २ पर्यंत सुरू ठेवण्याचे आदेश देण्यात आले आहेत. त्यानुसार शनिवारी मालमत्ता कराचा भरणा करण्यासाठी मनपात नागरिकांनी सकाळपासूनच एकच गर्दी केली होती. यावेळी लाखोंचा भरणा करण्यात आला.
विलास नायर यांची निवड
जळगाव : भाजपच्या जिल्हा महानगर बुद्धिजीवी प्रकोष्ठच्या जिल्हाध्यक्षपदी विलास नायर यांची निवड करण्यात आली आहे. आमदार तथा जिल्हाध्यक्ष सुरेश भोळे यांच्या हस्ते नायर यांना नुकतेच निवडीचे पत्र देण्यात आले.