लोकमत न्यूज नेटवर्क
भुसावळ : शहरातील चोरी घरफोडी सत्रातील गुन्हेगारी वृत्तीचा बिमोड करण्यासाठी संभाव्य घरफोडी, चोरी यासारख्या गुन्ह्यांना प्रतिबंध करण्याच्या दृष्टिकोनातून ३ रोजी भुसावळ उपविभागातील पोलीस स्टेशन्सला यापूर्वी घरफोडीचे गुन्हे दाखल असणाऱ्या आरोपींची अर्थात रेकॉर्डवरील आरोपींची ओळख परेड व कसून चौकशी दुपारी १२:३० ते २:३० अडीचच्या दरम्यान घेण्यात आली.
ओळख परेडमध्ये उपविभागातील भुसावळ शहर पोलीस स्टेशनचे रेकॉर्डवरील ७ आरोपी, बाजारपेठ पोलीस स्टेशनचे रेकॉर्डवरील ७ आरोपी व भुसावळ तालुका पोलीस स्टेशनचे रेकॉर्डवरील ७ आरोपी याप्रमाणे एकूण २१ रेकॉर्डवरील आरोपी बोलावण्यात आले होते. ओळख परेड दरम्यान त्यांना सविस्तर विचारपूस करण्यात आली. त्याशिवाय सद्य:स्थितीत हे आरोपी काय करतात? कोणते वाहन वापरतात? कोणता मोबाइल वापरतात? आदी बाबींची सविस्तर माहिती नोंदविण्यात आली तसेच त्यांचे इंटरोगेशन फॉर्म भरून घेण्यात आले.
त्यांना चांगल्या वर्तनाची समज देण्यात आली. याशिवाय त्यांच्यावर सीआरपीसी ११० खाली प्रतिबंधात्मक कारवाईचे प्रस्ताव तयार करण्यात आहेत.
ही ओळख परेड पोलीस निरीक्षक भागवत बाजारपेठ पोलीस स्टेशन, शहर पोलीस ठाण्याचे पोलीस निरीक्षक बाबासाहेब ठोंबे, तालुक्याचे पोलीस निरीक्षक कुंभार, तिन्ही पोलीस स्टेशन यांच्या गुन्हे शाखेतील अंमलदारांनी केली.