दरोडा नव्हे, विश्वस्तांमधला वाद

पोलिसांचा निष्कर्ष : शिरागडमधील प्रकरणातून पुढे आलेली माहिती

यावल : तालुक्यातील शिरागडच्या सप्तशृंगीदेवीच्या मंदिरातील मारहाण करून दानपेट्या लुटल्याचा प्रकार रविवारी रात्री घडली. मात्र तो दरोडा नसून विश्वस्तांमधील अंतर्गत वादातून हा प्रकार झाल्याची माहिती पोलिसांनी दिली. त्यामुळे या प्रकरणास वेगळेच वळण मिळाले आहे. या प्रकरणात विश्वस्त असल्याचा दावा करणारे शांताराम सदू सोळंके यांना पोलिसांनी संशयित आरोपी म्हणून काल रात्री अटक केली़ आरोपीस यावल न्यायालयाने तीन दिवसाची पोलीस कोठडी सुनावली़ तालुक्यातील शिरागड येथील श्री सप्तशृंगीदेवीच्या मंदिरात रविवारी रात्री २५ ते ३० वर्षे वयोगटातील पाच-सहा अज्ञात युवकांनी रवींद्र एकनाथ पाटील (वय ३८) व पुजारी महादू मन्साराम कोळी (वय ६५) यांना लाकडी दांड्याने मारहाण करून मंदिरातील दानपेट्या फोडून रक्कम लंपास केल्याची फिर्याद पुजारी महादु कोळी यांनी दिल्याने दरोड्याचा गुन्हा दाखल झाला होता़ विश्वस्त समितीचा वाद गेल्या अनेक वर्षांपासून एकनाथ पुंडलिक पाटील हे मंदिराचे विश्वस्त म्हणून काम पाहत होते. शांताराम सदू सोळंके यांनी नवीन विश्वस्त समिती स्थापन केली असून एकनाथ पुंडलिक पाटील व शांताराम सदू सोळंके यांच्यातील हा वाद गेल्या १५ वर्षापासून न्यायप्रविष्ट आहे. एकनाथ पाटील यांचे १२ जानेवारी १४ रोजी निधन झाले. तेव्हापासून एकनाथ पाटील यांचा वारस म्हणून त्यांचा मुलगा रवींद्र एकनाथ पाटील मंदिराची देखभाल पाहत होता़ परिणामी दावेदार विश्वस्त शांताराम सोळंके व रवींद्र यांच्यात बेबनाव होत होता. रवींद्र पाटील यांनी गेल्या महिन्यात यावल पोलिसांना तसे पत्रही दिले होते. दरोडेखोरांनी मंदिरातील केवळ दानपेट्या फोडल्या व रक्कम लंपास केली नाही तसेच तिघे झोपलेले असताना केवळ रवींद्र यास का मारहाण केली? यासह अनेक प्रश्न अनुत्तरीत आहेत. निरीक्षक मोरे यांनी मंगळवारी शांताराम सोळंके यांच्या न्यायप्रविष्ठ असलेल्या समितीतील विश्वस्त, पुजारी महादू कोळी, भास्कर कोळी, भिका भोई यांना चौकशीसाठी बोलाविले होते, मात्र सर्वच जण ज्येष्ठ नागरिक असल्याने त्यांच्याकडून माहिती काढणे पोलिसांसाठी आव्हान ठरले आहे़ रवींद्रकडे बोट दाखविणारा कोण? झोपलेल्या तिघांपैकी रवींद्रकडे बोट दाखविल्याचेही पोलिसांना सांगण्यात आले. तो बोट दाखविणारा कोण आहे ? याचाही पोलीस तपास घेत आहेत. पोलीस अधिकार्‍यांच्या भेटी अपर पोलीस अधीक्षक एन. अंबिका, उपविभागीय पोलीस उपअधीक्षक देवेंद्र शिंदे, गुन्हा अन्वेषण विभागाचे पोलीस निरीक्षक प्रभाकर रायते, सहा.पोलीस निरीक्षक अजय खर्डे, किरण शिंदे यांनी घटनास्थळी काल भेटी दिल्या़ अधिक तपास पोलीस निरीक्षक मोरे यांच्या मार्गदर्शनाखाली ज्ञानेश्वर पाटील, राजू पाटील, संजय भदाणे, व्ही.व्ही.धनगर, विनोद पाटील करीत आहेत. भाविकांच्या भावनांना तडा वणी, जि़नाशिक येथील सप्तशृंगीदेवीएव्हढेच शिरागडास खान्देशवासी महत्त्व देत असल्याने दररोज शेकडो भाविक येथे हजेरी लावतात़ अनेक जण आपापल्या परीने देणगी देतात, मात्र विश्वस्तांच्या वादात आता भाविक भरडला जात असल्याची भावना व्यक्त होत आहे. (वार्ताहर)