जळगाव : ‘वाघा सारखे जगलो, वाघा सारखेच मरतो..., गणेशचे लग्न ठरलेल्या वेळेतच कर', अशा आशयाची चिठ्ठी लिहून नूतन मराठा महाविद्यालयात लिपिक असलेल्या धनराज कांतीलाल वाघ (३३) या तरुणाने राहत्या घरात गळफास घेऊन आत्महत्या केली. ही घटना मंगळवारी रात्री ९.१५ वाजता जळगावात घडली.
धनराज हा रामेश्वर कॉलनीतील व्हीआयपी गल्लीत वास्तव्याला होता. पत्नी सीमा ही मुलगा ओम (वय ८) व कार्तिक (वय ४) या दोघांना सोबत घेऊन माहेरी रसलपुर, ता.रावेर येथे निघून गेलेली आहे. त्यामुळे धनराज हा घरी एकटाच राहत होता. त्याचा लहान भाऊ मंगळवारी रात्री ९.१५ वाजता धनराज याच्या घरी गेला असता धनराज याने गळफास घेतलेला आढळून आला. जिल्हा रुग्णालयात डॉक्टरांनी धनराजला मृत घोषित केले.