शाम जाधव
चोपडा (जि. जळगाव) : शहरातील साने गुरुजी वसाहत भागात राहणारा आकाश भोई (२१) या युवकावर पूर्ववैमनस्यातून चाकूहल्ला झाला. चोपडा शहरात मंगळवारी दुपारी एक ते दीड वाजेच्या सुमारास ही घटना घडली. यामुळे शहरात अफवा पसरल्याने पळापळ सुरू झाली. मुख्य बाजार पेठेतील दुकाने बंद झाली.
काही पालकांनी शाळेतून आपल्या पाल्यांना घरी नेले. घटनेची माहिती मिळताच पो. नि. के. के.पाटील, सपोनि अजित साबळे, पोउनि संतोष चव्हाण आणि कर्मचारी संवेदनशील ठिकाणांवर पोचले नागरिकांना आवाहन करत आपापली दुकाने उघडण्याची सूचना केली. उपजिल्हा रूग्णालयात उपचार घेत असलेला जखमी आकाश भोई या तरुणावर उपजिल्हा रुग्णालयाचे वैद्यकीय अधिकारी डॉ. सुरेश पाटील, डॉ.पवन पाटील, डॉ.स्वप्ना पाटील यांनी उपचार केले. जखमी आकाश हा जळगाव, धुळे, नंदुरबार या तीन जिल्ह्यातून हद्दपार असल्याचे कळते. संवेदनशील भागात बंदोबस्त तैनात करण्यात आला आहे.