ऑनलाइन लोकमत
जळगाव, दि. 2 - केंद्रीय गुन्हे अन्वेषण (सीबीआय)चे सहा अधिका-यांचे पथक गेल्या दोन दिवसांपासून जिल्ह्यात दाखल झाले असून या पथकाकडून जिल्हा बँकेची मुख्य शाखा तसेच चोपडा व अमळनेर शाखांचीही तपासणी करण्यात आली. नोटाबंदीच्या काळात जिल्हा बँकेत १५० कोटीच्या ठेवी व ३० कोटींचा कर्ज भरणा झाला होता. अवघ्या तीन दिवसात इतक्या मोठ्या प्रमाणात ही रक्कम बँकेत जमा झाल्याने त्याची चौकशी सीबीआयने सुरू केल्याची माहिती सूत्रांनी दिली.
सीबीआयच्या या पथकात ५ पुरुष व १ महिला अधिका-याचा समावेश आहे. गुरुवारी सकाळी ९.३० वाजताच हे पथक जिल्हा बॅँकेच्या मुख्य शाखेत दाखल झाले. कार्यालयात शिपाई व सुरक्षा रक्षकाशिवाय कोणीच नव्हते. कर्मचा-यांनी ही माहिती बॅँकेचे कार्यकारी संचालक जितेंद्र देशमुख यांना दिली. ते लागलीच बँकेत दाखल झाले. बाहेरील पथक आल्याच्या पार्श्वभूमीवर बँकेत स्मशान शांतता होती.
अभिकोष व सांख्यिकी विभागात तपासणी
जिल्हा बँकेत चार जणांचे पथक होते. त्या शिवाय बीएसएनएल व रेल्वे विभाग असे प्रत्येकी दोन या प्रमाणे 4 पंच साक्षीदार सोबत घेण्यात आले होते. या पथकाने सुरुवातीला अभिकोष व सांख्यिकी विभागात कागदपत्रांची तपासणी केली.
पत्रकार व नागरिकांना प्रवेश बंदी
दुपारी बारा वाजेनंतर बाहेरील व्यक्ती तसेच पत्रकारांना बँकेत प्रवेश नाकारण्यात आला होता. प्रवेशद्वाराजवळच सुरक्षा रक्षक तैनात करण्यात आला होता. बँक कर्मचारी व महत्त्वाचे काम असलेल्या लोकांनाच प्रवेश दिला जात होता. तशी नोंद सुरक्षा रक्षकाकडे घेतली जात होती. नेमके कोण अधिकारी आहेत हे दुपारपर्यंत निम्म्याहून अधिक कर्मचा-यांना माहितीही नव्हते.