काँग्रेसची स्वबळाची तयारी : जिल्हाध्यक्षांनी तातडीने सादर केली प्रदेशाध्यक्षांकडे माहिती
जळगाव : विधानसभा निवडणुकीसाठी राष्ट्रवादीने १४४ जागांची मागणी ताणून धरल्याने काँग्रेसने पर्यायी व्यवस्था म्हणून स्वबळावर लढण्याची तयारी सुरू केली आहे. त्यासाठी सध्या राष्ट्रवादीच्या वाट्याला असलेल्या मतदारसंघातील इच्छुकांची यादी प्रदेश काँग्रेसने तातडीने मागविली आहे.
जिल्ह्यातील ११ विधानसभा मतदारसंघांपैकी ४ मतदारसंघ काँग्रेसच्या तर ७ मतदारसंघ राष्ट्रवादीच्या वाट्याला आहेत. या ७ मतदारसंघातील काँग्रेसच्या इच्छुकांच्या नावांची यादी रविवारी तातडीने प्रदेश कार्यालयाला पाठविण्यात आली आहे. त्यात अनुसूचित जमातीसाठी राखीव चोपड्यातून पंचायत समितीचे माजी सदस्य गुलाब बारेला, माजी जि.प.सदस्य मासूम तडवी, नगराध्यक्षा मनीषा चव्हाण, शहर काँग्रेसचे अध्यक्ष संजीव बाविस्कर, निर्जलाबाई भिल यांच्या नावांचा समावेश आहे.
चाळीसगावमधून मार्केट कमिटी सभापती रोहिदास लाला पाटील, जिल्हा काँग्रेस सरचिटणीस अनिल निकम, चाळीसगाव महिला काँग्रेस अध्यक्ष शोभा पवार, ४0गाव जनता बँक अध्यक्ष अशोक खलाणे, माजी उपनगराध्यक्ष शिवाजी राजपूत, युवक काँग्रेस उपाध्यक्ष राहुल मोरे इच्छुक आहेत.
अनुसूचित जातीसाठी राखीव भुसावळमधून जिल्हा काँग्रेस सरचिटणीस रवींद्र निकम, चाळीसगावचे माजी आमदार अँड.ईश्‍वर जाधव, मोहन निकम, तसेच युवक काँग्रेसचे माजी अध्यक्ष अँड.अविनाश भालेराव तर मुक्ताईनगरमधून काँग्रेसचे माजी जिल्हाध्यक्ष उदय पाटील, भुसावळ पं.स.चे माजी सभापती वीरेंद्रसिंह पाटील, काँग्रेस कमिटीचे अध्यक्ष आत्माराम जाधव हे इच्छुक आहेत.
तर पाचोर्‍यातून प्रांतिकचे सरचिटणीस राहिलेले प्रदीप पवार, युवक काँग्रेसचे माजी अध्यक्ष अँड.अविनाश भालेराव, तालुकाध्यक्ष शांताराम सोनजी पाटील, जि.प. सदस्य डॉ.उत्तमराव महाजन आदी इच्छुक आहेत.
एरंडोलमधून माजी आमदार महेंद्रसिंह पाटील, जिल्हा सरचिटणीस विजय महाजन, जिल्हा सरचिटणीस डॉ.प्रवीण वाघ, प्राचार्य उल्हास पवार, जिल्हा सरचिटणीस जगदीश पाटील हे इच्छुक आहेत. त्यांनीही मुलाखती दिल्या आहेत.
या तीन पैकी किमान जळगाव ग्रामीणची जागा तरी मिळावी, यासाठी हालचाली सुरू आहेत. जळगाव ग्रामीणमधून इंटकचे जिल्हाध्यक्ष डी.जी. पाटील, पूर्वी जळगाव महानगराध्यक्ष राहिलेले उत्तमराव सपकाळे, यांच्यासह दोन-तीन जण इच्छुक आहेत.
मंगला पाटीलही इच्छुक
जळगाव शहरची जागा पूर्वीच्या वाटपानुसार काँग्रेसकडे असली तरीही जर ही जागा फेरबदलात राष्ट्रवादीकडे आली तर त्यासाठी इच्छुकांनी फिल्डिंग लावणे सुरू केले आहे. महानगराध्यक्ष मनोज चौधरी मुंबईत तळ ठोकून आहेत. तर बैठकीसाठी मुंबईला जात असलेल्या महिला आघाडीच्या प्रदेश उपाध्यक्षा मंगला पाटील ह्यादेखील जळगाव शहरातून उमेदवारीची मागणी करणार आहेत. विधानसभा निवडणुकीच्या पार्श्‍वभूमीवर राष्ट्रवादी प्रदेशाध्यक्षांनी महिला पदाधिकार्‍यांची जिल्हानिहाय बैठक मंगळवारी आयोजित केली असून जिल्ह्यातील महिला पदाधिकारीही या बैठकीसाठी रवाना झाल्या आहेत. प्रदेशाध्यक्ष सुनील तटकरे तसेच महिला आघाडीच्या प्रदेशाध्यक्षा उषा दराडे, आमदार विद्या चव्हाण यांच्या उपस्थितीत मंगळवारी महिला पदाधिकार्‍यांच्या जिल्हानिहाय बैठकी होतील. तर बुधवारी सर्वसाधारण बैठक होणार आहेत. महिला पदाधिकार्‍यांची मुंबईत बैठक ग्रामीण भागात ७ ठिकाणी मेळावे प्रदेश काँग्रेसने राष्ट्रवादीशी वाटाघाटी सुरू ठेवल्या असल्या तरीही जर वाटाघाटी फिस्कटल्या तर ऐनवेळी फजिती नको म्हणून स्वबळाची तयारी चालविली आहे. त्यासाठी जिल्ह्यात ग्रामीण भागात ७ ठिकाणी मेळावे घेण्याच्या सूचना केल्या आहेत. त्यादृष्टीने नियोजन सुरू झाले आहे.