जळगाव : डॉ.बाबासाहेब आंबेडकर यांनी लिहिलेल्या घटनेला अजून कोणी हात लावलेला नाही, आणि कोणी लावलाच तर आमच्यासारखा वाईट कोणीच नाही असा इशारा केंद्रीय सामाजिक न्याय मंत्री तथा रिपब्लिकन पार्टी ऑफ इंडियाचे अध्यक्ष रामदास आठवले यांनी दिला आहे. दरम्यान, नरेंद्र मोदी हेच तिसऱ्यांदा पंतप्रधान होतील, असा दावाही आठवले यांनी केला.
रिपब्लिकन पार्टी ऑफ इंडिया या पक्षाचे उत्तर महाराष्ट्र कार्यकर्ता प्रशिक्षण शिबिर गुरुवारी जळगावात झाले. त्यात मार्गदर्शन करताना आठवले बोलत होते.
राज्य घटना बदलाला आठवले यांनी या बैठकीत विरोध दर्शविला आहे. तसा प्रयत्न झाला तर त्याचे गंभीर परिणाम भोगावे लागतील. नाशिक जेलमध्ये मी १५ दिवस राहिलो आहे. आताही जेलमध्ये जाण्याची तयारी आहे, असे आठवले म्हणाले.
एकनाथ शिंदेच मुख्यमंत्री असतील
एकनाथ शिंदे हेच मुख्यमंत्री असतील, त्यांच्या जागी कोणीच मुख्यमंत्री होऊ शकत नाही. महायुती अभेद्य आहे. त्यामुळे चर्चा, अफवांकडे लक्ष देऊ नका. आगामी निवडणूका लक्षात घेता कार्यकर्त्यांनी कामाला लागावे. गाव तेथे शाखा, गल्ली तेथे फलक व झेंडा असलाच पाहिजे. रिपब्लिकन पार्टी ऑफ इंडिया हा पक्ष आता एका समाजापुरता राहिलेला नाही. सर्व समाजाचे लोक या पक्षात आहेत. सरकारच्या योजना घराघरात पोहचवा. अधिकारी काम करीत नसतील तर त्यांना ठणकावून सांगा. आदीवासींना त्यांच्या गायरान जमिनी, घरे मिळवून द्या.