वॉचमनच्या घरात चोरट्यांचा डल्ला; नऊ हजारांचा ऐवज लंपास
लोकमत न्यूज नेटवर्क
जळगाव : राष्ट्रीय महामार्गावरील सहारा हॉटेलजवळील पत्र्याच्या खोलीत राहणाऱ्या वॉचमनच्या घरात अज्ञात चोरट्यांनी डल्ला मारीत नऊ हजारांचा ऐवज लंपास केला. या प्रकरणी शनिपेठ पोलीस ठाण्यात अज्ञात चोरट्याविरुद्ध गुन्हा दाखल करण्यात आला आहे. दरम्यान, बुधवारी (दि. १७) मध्यरात्री तीन वाजता जाग आल्यावर घरात पाणी पिण्यासाठी गेल्यानंतर ही घटना उघडकीस आली आहे.
सुरेश सोनू राठोड हे कालिका माता मंदिराजवळील सहारा हॉटेलशेजारी बांधकाम सुरू असलेल्या इमारतीच्या आवारातील पत्राच्या शेडमध्ये राहतात. त्या इमारतीच्या ठिकाणी वॉचमन म्हणून ते कामाला आहेत. १७ मार्च रोजी रात्री जेवण झाल्यानंतर सुरेश राठोड हे पत्नीसह बांधकाम सुरू असलेल्या इमारतीत झोपण्यासाठी गेले; तर मुले घरात झोपलेली होती. मध्यरात्री अज्ञात चोरट्याने घरात शिरून दोन मोबाईल, टीव्ही आणि मिक्सर असा एकूण नऊ हजार रुपये किमतीचा मुद्देमाल चोरून नेला. मध्यरात्री सुरेश राठोड यांना जाग आल्यानंतर ते पाणी पिण्यासाठी घराकडे गेले. त्यांना घराचा दरवाजा उघडा दिसला. घरात जाऊन पहिल्यानंतर त्यांना टीव्ही दोन मोबाईल व मिक्सर चोरीला गेल्याचे दिसून आले. अखेर गुरुवारी (दि. १८) त्यांच्या पत्नी छाया राठोड यांच्या फिर्यादीवरून शनिपेठ पोलीस ठाण्यात गुन्हा नोंदविण्यात आला आहे. पुढील तपास साहाय्यक फौजदार किरण पाठक करीत आहेत.