जळगाव : जळगावच्या वृषाली ठाकरे आणि साक्षी बाविस्कर यांनी जबरदस्त खेळ करताना औरंगाबादच्या करिष्मा कालिके आणि आदिती जगताप यांचा पाडाव करत, जेएमडीवायसी खुल्या पिकलबॉल स्पर्धेत महिला दुहेरीचे जेतेपद पटकावले. दुसरीकडे प्रशांत राऊळ आणि श्रीजीत नायर यांनी पुरुष दुहेरीत कांस्य पदक जिंकले.
जल मंगल दीप युथ क्लब (जेएमडीवायसी) आणि रोट्रॅक्ट क्लब ऑफ बॉम्बे यांच्या संयुक्त विद्यमाने झालेल्या या स्पर्धेला अखिल भारतीय पिकलबॉल संघटना (एआयपीए) आणि अमॅच्युअर पिकलबॉल फेडरेशन यांची मान्यता होती. महिला दुहेरीचा अंतिम सामना अत्यंत एकतर्फी रंगला. वृषाली-साक्षी या जोडीने सावध सुरुवातीनंतर आक्रमक पवित्रा घेत, करिष्मा-आदिती यांना एकही संधी दिली नाही. वृषाली-साक्षी यांनी सरळ दोन सेटमध्ये बाजी मारताना ११-७, ११-५ अशा विजयासह जेतेपद पटकावले.
स्पर्धेत मिश्र दुहेरी गटामध्ये जळगावने शानदार कामगिरी केली. जळगावच्याच खेळाडूंमध्ये झालेल्या कांस्य पदकाच्या लढतीत चमकदार खेळ झाला. यामध्ये अजय चौधरी-वृषाली ठाकरे यांनी कांस्य पदक पटकावताना भूपेंद्र पोळ-साक्षी बाविसकर यांचा ११-८, ११-९ असा पराभव केला.