मुक्ताईनगर, जि. जळगाव : विधानसभेचे विरोधी पक्षनेते देवेंद्र फडणवीस यांच्या मुक्ताईनगर येथील पाहणी दौऱ्यात एका तरुण शेतकऱ्याने ताफ्यातील वाहने अडवत विष प्राशन करून आत्महत्या करण्याचा प्रयत्न केला. मुक्ताईनगर तालुक्यातील मेळसांगवे येथे मंगळवारी दुपारी १ वाजण्याच्या सुमारास हा प्रकार घडला. योगेश पाटील असे या शेतकऱ्याचे नाव आहे.
मुक्ताईनगर व रावेर तालुक्यात वादळी पावसाने झालेल्या नुकसानीची फडणवीस यांनी मंगळवारी पाहणी केली. त्यावेळी हा प्रकार घडला. मंगळवारी दुपारी फडणवीस यांच्या वाहनांचा ताफा या शेतकऱ्याच्या शेताकडून जात होता. त्याचवेळी योगेश याने ताफा अडवून फडणवीस यांना आपल्या शेतात येऊन पाहणी करावी, अशी विनंती केली. मात्र, त्यांनी टाळल्याने आपला दौरा फोटो सेशनसाठी असल्याचा आरोप त्याने केला. यावेळी योगेश याने सोबत विषाचा डबा आणला होता. तो पोलिसांनी जप्त केला. यानंतर फडणवीस यांच्या वाहनाचा ताफा पुढे मार्गस्थ झाला.
चौकट
फडणवीस खडसेंच्या कोथळीत, तर खडसे मुंबईत
माजी मंत्री एकनाथ खडसे यांच्या राजकीय कारकिर्दीला गतिरोधक ठरलेले देवेंद्र फडणवीस यांनी मंगळवारी खडसे यांच्या कोथळी येथील मुक्ताई सदन येथे खासदार रक्षा खडसे यांच्याकडे सदिच्छा भेट दिली. तिकडे खडसे मात्र सोमवारी मुंबई येथे पोहोचले आहेत. मंगळवारी सकाळी अकरा वाजून पाच मिनिटांनी खासदार रक्षा खडसे यांच्या निवासस्थानी कोथळीत पोहोचले. त्यांच्यासोबत गिरीश महाजन, खासदार उन्मेष पाटील, आमदार मंगेश चव्हाण, आमदार संजय सावकारे, मलकापूरचे माजी आमदार चैनसुख संचेती आदी उपस्थित होते. सुमारे २० मिनिटे फडणवीस हे मुक्ताई सदनात थांबले होते. फडणवीस खडसे यांच्या निवासस्थानी, या वृत्ताने अनेकांच्या भुवया उंचावल्या आहेत. दरम्यान, खासदार रक्षा खडसे यांनी चहापानाचे निमंत्रण दिले. त्यामुळे आपण तिथे गेलो होतो. यात इतर कुठलेही कारण नव्हते. असे फडणवीस यांनी रावेर येथे पत्रकारांशी बोलतांना सांगितले. दरम्यान, मुक्ताईनगर येथे शिवसैनिकांनी फडणवीस यांचा ताफा अडवत केळी पीक विम्याबाबत केंद्राच्या भूमिकेबाबत नाराजी व्यक्त करीत पूर्वीची योजनाच अंमलात आणावी, अशी मागणी केली.
चौकट
भाजप पदाधिकारी अनुपस्थित
फडणवीस यांच्या दौऱ्याप्रसंगी भारतीय जनता पक्षाचे मुक्ताईनगर तालुक्यातील अनेक पदाधिकारी अनुपस्थित होते. मुक्ताईनगर नगर पंचायतीचे आठपैकी केवळ नगराध्यक्ष नजमा तडवी आणि ललित महाजनवगळता एकही नगरसेवक उपस्थित नव्हता.
नुकसानग्रस्त शेतकऱ्यांना
सरसकट भरपाई द्या
वादळी पावसाने शेतकऱ्यांचे मोठे नुकसान झाले आहे. केळीला मोठ्या प्रमाणात फटका बसला आहे. ही बाब लक्षात घेता सरकारने पंचनामे न करता नुकसानग्रस्त शेतकऱ्यांना सरसकट भरपाई द्यावी, अशी मागणी देवेंद्र फडणवीस यांनी रावेर येथे पत्रकार परिषदेत केली.
पीक विम्यासंदर्भात राज्य सरकारने मागील हंगामात टेंडरच न काढल्याने स्वतःच्या चुका व नाकर्तेपणा लपविण्यासाठी केंद्राकडे बोट दाखवून राज्य सरकार खोटारडेपणा करत असल्याचा आरोप फडणवीस यांनी केला. राज्य सरकार निकष ठरवते व केंद्र पैसा देते. मात्र, राज्य सरकार स्वतःची चूक लपवत असल्याचे ते म्हणाले.
फडणवीस यांनी जामनेरला घेतला राजकीय स्थितीचा आढावा
विरोधी पक्षनेते देवेंद्र फडणवीस यांची भाजपचे जिल्ह्यातील खासदार, आमदार व माजी आमदारांनी मंगळवारी सकाळी माजी मंत्री गिरीश महाजन यांच्या निवासस्थानी भेट घेतली. जिल्ह्यातील राजकीय स्थितीचा फडणवीस यांनी आढावा घेतला. सोमवारी रात्री दहाच्या सुमारास फडणवीस यांचे जामनेरला आगमन झाले. नगराध्यक्ष साधना महाजन यांनी त्यांचे स्वागत केले.