लोकमत न्यूज नेटवर्क
जळगाव : कोरोना प्रतिबंधक लसीकरणात ४५ वर्षांवरील सर्वांना लस देण्याच्या चौथ्या टप्प्याला आठवडा उलटला आहे. त्यात गेल्या आठ दिवसांत ४० हजारांपेक्षा अधिक लसीकरणाची नोंद करण्यात आली आहे. त्यात २५ हजारांपेक्षा अधिक ४५ वर्षांवरील नागरिकांनी कोरोना लसीचा पहिला डोस घेतला आहे. दुसरीकडे आरोग्य, फ्रंट लाईन वर्कर यांचे लसीकरण बंद झाले असून आता केवळ ४५ वर्षांवरील नागरिकांनाच लस दिली जात आहे. दरम्यान, एकत्रित आकडेवारी बघता तरुणांपेक्षा ज्येष्ठांचा या लसीकरणात अधिक उत्साह दिसून येत आहे.
लसीकरणासाठी जिल्ह्यात कोविशिल्ड व कोव्हॅक्सिन या दोनही लसीचे डोस प्राप्त झाले आहेत. सर्व प्राथमिक आरोग्य केंद्रांमध्ये लसीकरण केले जात आहे. पहिला टप्पा संथगतीने झाल्यानंतर तिसऱ्या व चौथ्या टप्प्यात लसीकरणात गती आली आहे. एका दिवसाला सरासरी आता ७ हजारांवर लसीकरण होत आहे. दरम्यान, सर्वच केंद्रांवर अन्य कोणापेक्षही ज्येष्ठांची संख्या अधिक दिसत असून १०२ वर्षांच्या वृद्ध महिलेनेही लस घेतली आहे.
असे झाले आहे लसीकरण
४५ - ६० वर्ष : पहिला डोस - २४९३३, दुसरा डोस - १५७
६० वर्षावरील : पहिला डोस ७४४३९, दुसरा डोस- ३७२
आरोग्य कर्मचारी : पहिला डोस - २४२९१, दुसरा डोस - १००९१
फ्रंट लाईन वर्कर : पहिला डोस - २२३२२, दुसरा डोस - ६०४७
एकूण लसीकरण पहिला डोस १६१२०१, दुसरा डोस १८२७२
खासगी रुग्णालये पहिला डोस २६९३२, दुसरा डोस ७७१
ग्रामीण भागात मोठा प्रतिसाद
शहरांपेक्षा ग्रामीण भागात लसीकरणाला मोठा प्रतिसाद मिळत आहे. यात प्राथमिक आरोग्य केंद्रांमध्ये मंगळवार ६ एप्रिलपर्यंत ५२१५४ इतक्या नागरिकांना लसीचा पहिला डोस देण्यात आला आहे तर शहरी भागात हेच प्रमाण कमी असल्याचे चित्र आहे. जळगाव शहरातील रेडक्रॉस रक्तपेढीचे केंद्र : ८०७४ एवढे लसीकरण झाले आहे.
जिल्ह्यात लसीकरणाचा चौथा टप्पा गतीने सुरू आहे. केंद्र वाढविण्यात आले आहेत. कोव्हॅक्सिन लसीचे नुकतेच काही डोस प्राप्त झाले आहेत. कोविशिल्ड लसीचे डोस प्राप्त होणार आहे. महिनाभरात चौथा टप्पा पूर्ण करायचे उद्दिष्ट आहे. सर्वच केंद्रांवर आता प्रतिसाद चांगला मिळत आहे.
- डॉ. एन. एस. चव्हाण, जिल्हा शल्यचिकीत्सक