जळगावात सुमधूर गीतांनी उजळली ‘दिवाळी पहाट’

लोकमत सखीमंचच्या उपक्रमास भरघो, प्रतिसाद

जळगाव : लोकमत सखी मंच आणि प्रकाश चिल्ड्रेन हॉस्पिटल यांच्या संयुक्त विद्यमाने आयोजित ‘दिवाळी पहाट’ या मराठी, हिंदी भावगीते, सुगम संगिताची सुरेल मैफिलीचे आयोजन रविवार २७ आॅक्टोबर रोजी काव्यरत्नावली चौक येथे आयोजन करण्यात आले होते. या वेळी सादर करण्यात आलेल्या एकाहून एक सरस गीतांनी दिवाळी पहाट उजळून निघाली.आमदार सुरेश भोळे यांच्याहस्ते या कार्यक्रमाचे उद््घाटन करण्यात आले. या वेळी गायक राहुल तायडे आणि आर.टी.एन्टरटेंन्टमेंट, अमरावती यांच्या चमूकडून एकापेक्षा एक सरस गाण्यांचे सादरीकरण करण्यात आले. यामध्ये मराठी, हिंदी भावगीते, सुगम संगीत, दिवाळी व भक्ती गितांची सुमधूर मैफल रंगली. सुरेख रांगोळी समवेत द्वीपप्रज्वलित करण्याचा आनंद, शुभेच्छांची रेलचेल आणि सोबतीला सुश्राव्य गीतांची मैफल जळगावकरांसाठी संस्मरणीय ठरली.या कार्यक्रमात सहपरिवार फक्त एक पणती घेऊन सहभागी शहरवासीय सहभागी झाले होेते. मराठी, हिंदी भावगीते, सुगम संगितामुळे होणारे सकाळचे प्रसन्न वातावरण यामुळे दिवाळीचा आनंद वाढविला.