महसुलात घट : १४४ कोटींचे होते उद्दिष्ट
जळगाव : कोरोनाचा वाढता संसर्ग प्रत्येक क्षेत्रात धोकेदायक ठरू लागला आहे. उद्योग -व्यवसायावरही मोठा परिणाम होऊ लागला आहे. इतकेच काय शासनाला येणारा महसूल थांबला असून, खर्च अधिक वाढलेला आहे. शासनाला महसूल मिळवून देणाऱ्या मोठ्या विभागांमध्ये आरटीओचा समावेश होतो. एकट्या जळगाव जिल्ह्यात यंदा या विभागाला कोरोनामुळे ४० कोटींचा फटका बसला आहे.
सन २०२०-२१ या आर्थिक वर्षात जळगाव आरटीओला १४४ कोटी ५३ लाख रुपयांचे महसुलीचे उद्दिष्ट शासनाकडून देण्यात आले होते. प्रत्यक्षात १०४ कोटी ८३ लाख रुपयांचे उत्पन्न मिळाले. ३९ कोटी ७० लाख रुपयांचा महसूल यंदा कमी मिळाला आहे. गेल्यावर्षी मार्च, एप्रिलपासूनच कोरोनाने शिरकाव केल्यामुळे सर्वत्र लाॅकडाऊन जाहीर झाला होता. यामुळे उद्योगधंदे व व्यवसाय बंद होते. सरकारी कार्यालयांतदेखील नगण्य उपस्थिती होती. वाहन उत्पादक कंपन्याही मोठ्या संख्येने बंद होत्या. त्याचा परिणाम हा प्रत्येक विभागाच्या महसुलावर तसेच रोजगारावर झालेला आहे.
आरटीओला वाहन खरेदी, नोंदणी, रोड टॅक्स व विविध प्रकारच्या कारवाईतून महसूल प्राप्त होतो. गेल्या आर्थिक वर्षात सर्वच प्रकारच्या कारवाया व वाहनांच्या नोंदणीत घट झालेली आहे.
*रोड टॅक्समधून मिळाले ८५ कोटी*
कोणतेही वाहन रस्त्यावर येण्यापूर्वी त्याची आरटीओ कार्यालयात नोंदणी होते त्याच वेळी या वाहन मालकाकडून रोड टॅक्स आकारला जातो अशा प्रकारच्या रोड टॅक्सच्या स्वरूपात आरटीओ विभागाला ८५ कोटी १२ लाख ३२ हजार २४५ रुपये एकरकमी मिळाले आहेत. त्याशिवाय ओव्हरलोड वाहनांच्या कारवाईतून १ कोटी ८५ लाख ५ हजार ४५० रुपयांचा महसूल मिळाला आहे. ५३८ वाहनांवर ही कारवाई करण्यात आली आहे. अवैध प्रवासी वाहतूक करणाऱ्या १,१३५ वाहनांवर कारवाई करण्यात आली असून, २७ लाख ८४ हजार ५९९ रुपयांचा दंड वसूल करण्यात आला आहे. रिक्षाच्या कारवाईतून ४ लाख ५४ हजार ६००, टॅक्सीच्या कारवाईतून ५९ हजार, हेल्मेटच्या कारवाईतून १ लाख ६६ हजार ५०० रुपयांचा, तर पीयूसीच्या कारवाईतून २ लाख ६१ हजार २०० रुपयांचा दंड वसूल करण्यात आला आहे.
*चॉइस नंबर्सने मिळवून दिले ३ कोटी*
चाॅईस नंबर्सची क्रेझ दिवसेंदिवस वाढत चालली आहे. लोकांचा याकडे वाढता कल पाहता अशा नंबर्ससाठी शासनाने काही रक्कम आकारण्याचा निर्णय घेतला. यातून एकट्या जळगाव आरटीओला २ कोटी ९६ लाख ८ हजार रुपये मिळाले आहेत.
कोट....
कोरोनामुळे मागील आर्थिक वर्षात महसुलाचे उद्दिष्ट पूर्ण होऊ शकले नाही. तरीदेखील आटोकाट प्रयत्न करुन १०५ कोटींच्या जवळ पोहोचलो आहेत. यंदादेखील अशीच परिस्थिती आहे.
- श्याम लोही, उपप्रादेशिक परिवहन अधिकारी
*दृष्टिक्षेपात आरटीओचा महसूल*
महसुलीचे उद्दिष्ट : १४४ कोटी ५३ लाख
प्राप्त महसूल : १०४ कोटी ८६ लाख
महसुलात घट : ३९ कोटी ७० लाख