जळगाव : पिंप्राळा रेल्वे उड्डाणपुलाजवळ रेल्वे रुळावर बुधवारी सकाळी ९ वाजता अनोळखी ६० वर्षीय वृद्धाचा मृतदेह आढळून आला. ही घटना रात्री घडल्याचा अंदाज असून अपघात आहे की, आत्महत्या हे स्पष्ट झालेले नाही. संबंधित वृद्धाला पाठीमागून मार लागल्याने बरगड्या तुटल्या आहेत. रेल्वे पोलिसांनी मृतदेह शासकीय रुग्णालयात हलविला. याप्रकरणी लोहमार्ग पोलिसात अकस्मात मृत्यूची नोंद करण्यात आली आहे. तपास अमलदार समाधान कंखरे व स्वप्नील महाले करीत आहेत.
गोलाणी मार्केटमधून दुचाकी लांबविली
जळगाव : गोलाणी मार्केटच्या पार्किंगमधून गोपाळ अशोक पोलभुणे (रा.पिंप्राळा) यांच्या मालकीची दुचाकी (क्र.एम.एच.१९ बी.टी.३१७६) लांबविण्यात आल्याचा प्रकार सोमवारी उघडकीस आला.याप्रकरणी मंगळवारी शहर पोलीस ठाण्यात गुन्हा दाखल करण्यात आला आहे.
वडली येथे आजपासून राज्यस्तरीय क्रिकेट स्पर्धा
जळगाव : तालुक्यातील वडली येथे श्री स्वामी समर्थ क्रिकेट क्लबतर्फे ४ फेब्रुवारीपासून राज्यस्तरीय टेनिस बॉल क्रिकेट स्पर्धेचे आयोजन करण्यात आले आहे. पहिला सामना आदर्श क्रिकेट टीम लासगाव व वैष्णवी कन्स्ट्रक्शन जळगाव यांच्यात होणार आहे. प्रगतिशील शेतकरी शेषराव रामकृष्ण पाटील यांच्या हस्ते सकाळी ९ वाजता स्पर्धेचे उद‌्घाटन होणार आहे. ५१ हजारांचे प्रथम पारितोषिकही त्यांच्याकडूनच देण्यात येणार आहे. संभाजी पाटील, जगन्नाथ पाटील व मुनील पाटील यांच्याकडून द्वितीय व तृतिय पारितोषिक रोख स्वरुपात दिले जाणार आहे. भूषण रोंदळे, सचिन पाटील, शिवाजी जाधव व विनोद पाटील यांनी स्पर्धेचे आयोजन केले आहे.
शहरात गस्त वाढवा
शहरात घरफोड्या, बॅगा लांबविणे या सारख्या घटना वाढलेल्या असतानाच आता दरोड्याची घटना घडली आहे. पोलिसांची गस्त कमी झाल्याचा हा परिणाम असून शहरात दिवस-रात्र गस्त वाढविण्यात यावी अशी मागणी रिपब्लिकन पार्टी ऑफ इंडियाचे महानगराध्यक्ष अनिल अडकमोल यांनी पोलीस अधीक्षक डॉ.प्रवीण मुंढे यांच्याकडे लेखी निवेदनाद्वारे केली आहे.