लोकमत न्यूज नेटवर्क
जळगाव : मनपा महापौर आणि उपमहापौरपदाच्या निवडणुकीत फुटलेल्या २७ नगरसेवकांना धडा शिकवण्यासाठी भाजपने तयारी केली असून, पक्षादेशाचा भंग केल्याचा ठपका ठेवत या सर्व नगरसेवकांना अपात्र ठरवावे, यासाठी बुधवारी नाशिकच्या विभागीय आयुक्तांकडे अपिल दाखल करण्यात आले आहे. यावेळी भाजपचे गटनेते भगत बालाणी, नाशिक महापालिकेचे गटनेते जगदीश पाटील व ॲड. संदीप भगत आदी उपस्थित होते.
महापालिकेच्या १८ मार्च रोजी झालेल्या महापौर व उपमहापौर पदाच्या निवडणुकीदरम्यान सत्ताधारी भाजपमध्ये उभी फूट पडून भाजपच्या सत्तावीस नगरसेवकांनी पक्षाचा व्हीप न जुमानता शिवसेनेशी हातमिळवणी केल्याने भाजपच्या महापौर पदाच्या उमेदवार प्रतिभा कापसे व उपमहापौर पदाचे उमेदवार सुरेश सोनवणे यांचा पराभव झाला होता. महापौरपदी शिवसेनेच्या जयश्री महाजन व उपमहापौरपदी भाजपचे बंडखोर कुलभूषण पाटील हे विजयी झाले होते. भाजपच्या सत्तावीस नगरसेवकांनी पक्षादेश न जुमानता पक्षाशी गद्दारी केल्याने त्यांचे नगरसेवकपद रद्द करण्यात यावे, याकरिता जळगाव मनपातील भाजपचे गटनेता भगत बालाणी यांनी बुधवारी दुपारी १ वाजता विभागीय आयुक्त राधाकृष्ण गमे यांच्याकडे याचिका दाखल केली.
आवश्यक कागदपत्रांची पूर्तता करण्यासाठी घेतला दोन आठवड्यांचा वेळ
शिवसेनेच्या गोटात सहभागी झाल्यानंतर या नगरसेवकांना भाजपने प्रत्यक्ष, मोबाईल, व्हाॅट्सॲप, वृत्तपत्र अशा वेगवेगळ्या माध्यमातून सहा प्रकारे पक्षादेश बजावला होता. मात्र, त्याचे उल्लंघन केल्याचा भाजपचा आरोप आहे. भाजपने फुटलेल्या सत्तावीस नगरसेवकांना अपात्र ठरविण्यासाठी पुरेसा वेळ घेतला असून, काही महत्त्वाचे कागदपत्रं जमा करण्यासाठी भाजपने स्थायी समिती सभापती राजेंद्र घुगे-पाटील, ॲड. शुचिता हाडा, विशाल त्रिपाठी व जितेंद्र मराठे या चार नगरसेवकांना कामाला लावले होते. महापालिकेसह इतर ठिकाणाहून काही कागदपत्रे भाजपने जमा केली असल्याची माहिती सुत्रांनी दिली. दरम्यान, महापालिकेच्या महापौर व उपमहापौर पदासाठी झालेल्या निवडणुकीदरम्यान ऑनलाईन महासभेत नगरसेवक व मनपाच्या अधिकाऱ्यांव्यतिरिक्त अन्य काहीजण सहभागी झाल्यामुळे ही महासभा बेकायदेशीर असल्याबाबतही न्यायालयात याचिका दाखल करण्याची तयारी भाजपने केली असल्याची माहिती सुत्रांनी दिली.