जळगाव : क्रिकेटचा सामना हरल्याचा राग मनात ठेवून राहुल पांडुरंग पाटील (रा. गाढोदा) या तरुणाने हेमराज सूर्यवंशी (रा. आमोदा) याच्या डोक्यात लाकडी दंडुक्याने मारहाण केली. ही घटना २१ मे रोजी सायंकाळी सहा वाजता आमोदा बसस्टँडजवळ घडली. याप्रकरणी तालुका पोलीस ठाण्यात गुन्हा दाखल करण्‍यात आला आहे.
१६ मे रोजी आमोदा गावात क्रिकेट मॅचचे आयोजन करण्‍यात आले होते. त्यावेळी गाढोदाचा संघ सामना हरला. याचाच राग मनात ठेवून गाढोदा येथील राहुल पाटील याने शुक्रवार, २१ मे रोजी सायंकाळी सहा वाजण्याच्या सुमारास आमोदा येथील बसस्टँडजवळ वाद उपस्थित केला. नंतर हेमराज सूर्यवंशी याला शिवीगाळ करून राहुल याने त्याच्या डोक्यात लाकडी दांडुक्याने मारहाण केली. यात हेमराज गंभीर जखमी झाला. या प्रकरणी ललित संजय सूर्यवंशी याच्या फिर्यादीवरून राहुल पाटील यांच्याविरुद्ध गुन्हा दाखल करण्‍यात आला आहे.