लोकमत न्यूज नेटवर्क
अमळनेर : महाराष्ट्र शासनाच्या पणन व वस्रोद्योग विभागाने अमळनेर बाजार समितीवर राष्ट्रवादीच्या जिल्हा बँक संचालिका तिलोत्तमा पाटील यांची मुख्य प्रशासक म्हणून निवड केली असून काँग्रेस, राष्ट्रवादी व शिवसेनेच्या आठ पदाधिकाऱ्यांची प्रशासक मंडळात नियुक्ती केली आहे.
पणन विभागाचे कार्यासन अधिकारी जयंत भोईर यांनी जिल्हा उपनिबंधकाना पत्र पाठवून तिलोत्तमा रवींद्र पाटील (शिरूड) मुख्य प्रशासक, प्रशासक मंडळ भागवत केशव सूर्यवंशी (खवशी), विजय काशीनाथ पाटील (चौबारी), संभाजी लोटन पाटील (लोण बु), किरण भालेराव पवार (मठगव्हाण), लालचंद त्र्यंबक पाटील (दापोरी), सुरेश विक्रम पाटील (एकरूखी), भाईदास सोनू अहिरे (भिल)(लोणे), जितेंद्र प्रेमसिंग राजपूत (कळमसरे) यांचा प्रशासक मंडळात समावेश मंडळावर नियुक्ती करण्यास पात्र असल्याची खात्री करून घ्यावी तसेच ज्या व्यक्तींविरुद्ध न्यायालयात गुन्हे दाखल आहेत, त्या व्यक्तीची नियुक्ती न्यायालयाच्या निर्णयाच्या आधीन राहून अशासकीय प्रशासक म्हणून करण्यास शासनाची मान्यता देण्यात आली आहे.
कोणत्याही सहकारी संस्थेवर सहा महिनेपेक्षा जास्त काळ प्रशासक ठेवता येत नाही. त्यामुळे आमदार अनिल पाटील यांनी राजकीय खेळी करत महाविकास आघाडीच्या सदस्यांना समाविष्ट करून तालुक्यात संतुलन साधण्याचा प्रयत्न केला आहे.