स्टार ७६९
लोकमत न्यूज नेटवर्क
जळगाव : कोरोना विषाणूचा प्रादुर्भाव रोखण्यासाठी राबविलेल्या माझे कुटुंब, माझी जबाबदारी अभियानात जळगाव जिल्ह्यात ८ लाख २१ हजार ४९ कुटुंबांतील ३३ लाख ९८ हजार २५७ नागरिकांची आरोग्य तपासणी करण्यात आली. यामध्ये सारीचे ८४२ तर सर्दी, खोकला, तापाचे ६ हजार ४९२ रुग्ण आले आहे. या सोबतच मोहिमेदरमम्यान ९७४ कोरोना बाधित रुग्ण आढळून आले.
कोरोना विषाणू संसर्गाची साखळी रोखण्यासाठी माझे कुटुंब, माझी जबाबदारी हे अभियान राबविण्यात आले. या अभियानाच्या काळात पथकांनी घरोघरी जाऊन नागरिकांची तपासणी केली.
या मोहिमेत आरोग्य पथकाने केलेल्या तपासणीदरम्यान ज्या नागरिकांना जुने आजार, कोरोना सदृश्य लक्षणे आढळली त्यांची माहिती संकलीत करण्यात आली. तसेच लक्षणे आढळून आल्यास अशा संशयितांचे स्वॅब घेण्यात आले व जे कोरोना बाधित आढळून आले त्यांचे लक्षणानुसार वर्गीकरण करण्यात येऊन उपचार करण्यात आले.
खाजगी डॉक्टरांचीही मदत
या मोहिमेअंतर्गत खाजगी डॉक्टरांचीही मदत घेण्यात आली. त्यांच्याकडे काही संशयित रुग्ण आढळून आल्यास त्यांना या विषयी माहिती देण्यात सांगितले. त्यामुळे त्यांच्याकडील रुग्णांची माहिती मिळण्यासह गावागावत सर्वेक्षण झाल्याने बाहेर गावाहून कोणी आलेले असल्यास त्यांचीही माहिती मिळू शकली.
एरंडोलला जास्त रुग्ण
माझे कुटुंब, माझी जबाबदारी अभियानात विविध आजाराचे रुग्ण आढळून आले. यामध्ये सारीच्या रुग्णांचा विचार केला तर एरंडोल तालुक्यात सर्वाधिक २०१ रुग्ण आढळून आले. त्याखालोखाल चोपडा तालुक्यातही १७५ सारीचे रुग्ण आढळून आले.
लक्षणानुसार वर्गीकरण व औषधोपचार
माझे कुटुंब, माझी जबाबदारी अभियानात आढळून आलेल्या कोरोना बाधित रुग्णांच्या लक्षणानुसार त्यांचे वर्गीकरण करण्यात आले. यात ज्यांना गृह विलगीकरणाची परवानगी देण्यात आली त्यांच्यावरही लक्ष ठे‌वण्यात येत असल्याचे अधिकाऱ्यांनी सांगितले. या सोबतच सर्दी, ताप, खोकला या आजारांच्या रुग्णांवर औषधोपचार करण्यात आले.
कोरोनाचे ९७४ तर सारीचे ८४२ रुग्ण
या अभियानात ९७४ कोरोना बाधित रुग्ण आढळून आले. या शिवाय सारीचेही ९७४ रुग्ण समोर आले.
या मोहिमेत लवकर तपासणी झाल्याने रुग्णांना वेळीच दाखल करता आले. तसेच वेगवेगळ्या आजाराच्या रुग्णांवरदेखील वेळीच उपचार झाल्याने त्यांचा आजार वाढला नाही.
या सोबतच वेळीच कोरोनाचे रुग्णदेखील आढळून आल्याने संक्रमण रोखण्यासह मृत्यूदरही कमी होण्यास यामुळे मदत झाली.
एकूण कुटुंब संख्या - ८,२१,०४९
किती कुटुंबांचे झाले सर्वेक्षण - ७,५०,०८२
सर्वेक्षणासाठीची पथके - २९१३
पथकातील कर्मचारी - ८७३९
सहव्याधी असलेल्या व्यक्ती
अमळनेर- ८२७
भडगाव-११६४
भुसावळ - ८८१
बोदवड -१३०
चाळीसगाव - ५८६
चोपडा- ७४४
धरणगाव - १७०
एरंडोल-६२७
जळगाव - ३२२
जामनेर - ४२७
मुक्ताईनगर-३०
पाचोरा - ४४३
रावेर - २५४
यावल - ४२२
--------------
माझे कुटुंब, माझी जबाबदारी या मोहिमेंतर्गत गावोगावी तपासणी झाल्याने वेळीच रुग्ण समोर आले. त्यामुळे त्यांना लगेच उपचारासाठी दाखल करता आले व संक्रमण रोखण्यासह मृत्यूदरही कमी होण्यास मदत झाली.
- डॉ. दिलीप पोटोळे, अतिरिक्त जिल्हा आरोग्य अधिकारी.