५० टक्के सवलतमुळे खान्देशातील ७० हजार शेतकऱ्यांनी भरले बीजबिल

उत्स्फूर्त प्रतिसाद : सवलतीतील ६६ टक्के निधी वीजयंत्रणेच्या विस्तारी करणासाठी वापरणार

लोकमत न्यूज नेटवर्क

जळगाव : महा कृषी ऊर्जा अभियानात महावितरणतर्फे कृषिपंपांच्या थकबाकीत विविध प्रकारची तब्बल ५० टक्के सवलत देण्यात येत आहे. त्यानुसार या सवलतींचा लाभ घेऊन खान्देशातील सुमारे ७० हजार शेतकऱ्यांनी कृषि‌‌पंपाचे वीजबिल भरले आहे. यातून महावितरणच्या खात्यात ७७ कोटींचा भरणा झाला असून, यातील ६६ टक्के निधी हा वीजयंत्रणेच्या विस्तारी करणासाठी वापरण्यात येणार असल्याची माहिती महावितरणतर्फे देण्यात आली.

शेतकरी बांधवांनी कृषिपंपाची थकबाकी भरण्यासाठी महा कृषी ऊर्जा अभियानांतर्गत पहिल्या वर्षी थकबाकी भरणाऱ्या कृषिपंप ग्राहकांच्या सुधारित मूळ थकबाकीवर ५० टक्के सवलत देण्यात येत आहे. त्यात व्याज व विलंब आकार पूर्णपणे माफ करण्यात आला आहे. त्यानुसार पहिल्या वर्षी संपूर्ण थकबाकी भरणाऱ्या ग्राहकांना जवळपास ६६ टक्के सवलत मिळणार आहे. दुसऱ्या वर्षात थकबाकी भरणाऱ्या ग्राहकांच्या सुधारित मूळ थकबाकीवर ३० टक्के, तर तिसऱ्या वर्षात थकबाकी भरणाऱ्या ग्राहकांच्या मूळ थकबाकीवर २० टक्के सवलत मिळणार आहे. या अभियानाचा लाभ घेणाऱ्या शेतकऱ्यांचे सप्टेंबर २०१५ पूर्वीच्या थकबाकीवरील सर्व व्याज व विलंब आकार माफ होणार आहे. तसेच सप्टेंबर २०१५ नंतरच्या थकबाकीवरील विलंब आकार पूर्णपणे माफ होणार आहे.

इन्फो :

७० हजार शेतकऱ्यांनी भरले बीजबिल

महाकृषी ऊर्जा अभियानांतर्गत कृषिपंपांच्या वीज बिलापोटी जळगाव जिल्ह्यातील ३५ हजार ३८६ शेतकऱ्यांनी वीज बिल भरले असून, यातील ४४ कोटी ३४ लाख रुपयांचा भरणा झाला आहे. तसेच धुळे जिल्ह्यातील २० हजार १९० शेतकऱ्यांनी १३ कोटी १३ लाख, तर नंदुरबार जिल्ह्यातील १४ हजार ११९ शेतकऱ्यांनी १९ कोटी ३१ लाखांचा भरणा केला आहे. असे एकूण खान्देशात ६९ हजार ६९५ शेतकऱ्यांनी ७६ कोटी ७८ लाख रुपयांचा भरणा केला आहे.

इन्फो :

आमदारांनीही घेतला महाकृषी ऊर्जा अभियानाचा लाभ

रावेर विधानसभा मतदारसंघाचे आमदार शिरीष चौधरी यांनीही या अभियानाचा लाभ घेऊन थकीत वीजबिल भरले आहे. त्यांनी खिरोदा व कुंभारखेडा येथील शेतातील दोन कृषिपंपांचे एक लाख ५६ हजार ४८० रुपये वीजबिल होते. महा कृषी ऊर्जा अभियानाचा लाभ घेतल्याने त्यांना चालू बिलांसह केवळ ९५ हजार रुपये भरावे लागले आहेत. या रकमेचा धनादेश त्यांनी महावितरणच्या सावदा विभागाचे कार्यकारी अभियंता गोरक्षनाथ सपकाळे यांच्याकडे नुकताच सुपूर्द केला.