बाजारातून दुचाकी लंपास
जालना : घनसावंगी तालुक्यातील कुंभार पिंपळगाव येथील बाजारात उभी केलेली दुचाकी चोरट्यांनी लंपास केल्याची घटना बुधवारी घडली. याप्रकरणी नामदेव अंशीराम तौर यांच्या फिर्यादीवरून घनसावंगी पोलीस ठाण्यात गुन्हा दाखल करण्यात आला.
गारटेकीच्या चिमुकलीचा अपघाती मृत्यू
तळणी : मंठा तालुक्यातील गारटेकी येथील एका तीन वर्षीय चिमुकलीचा ट्रॅक्टरखाली चिरडून मृत्यू झाल्याची घटना ३ फेब्रुवारी रोजी बेळगाव जिल्ह्यातील मामदापूर येथे घडली. शिमरण अविनाश राठोड (वय ३ रा. गारटेकी, ता. मंठा) असे मयत चिमुकलीचे नाव आहे. चिमुकलीचे आई- वडील हे उसतोंडीसाठी कर्नाटक राज्यातील मामदापूर (ता. गोकाक) येथे गेले होते. पोलिसांनी ट्रॅक्टर क्र. (केए.४९.टीए.४२४७) ला ताब्यात घेतले. याप्रकरणी गोकाक पोलीस ठाण्यात गुन्हा दाखल करण्यात आला. या घटनेमुळे गारटेकी गावात हळहळ व्यक्त होत आहे.
शॉर्टसर्किटमुळे घराला लागली आग
बदनापूर : तालुक्यातील वाल्हा येथील विष्णू पाराजी कठाळे यांच्या घराला ३० जानेवारी रोजी दुपारी शॉटसर्किटमुळे आग लागली. या आगीत संसारोपयोगी साहित्य जळून खाक झाले. यात त्यांचे ९० हजार रुपयांचे नुकसान झाले. नुकसान भरपाई देण्याची मागणी विष्णू कठाळे यांनी केली. सदरील घटनेचा बदनापूर पोलिसांनी पंचनामा केला.
भीमराव वीर यांचा सत्कार
जामखेड : अंबड तालुक्यातील जामखेड येथील पशुवैद्यकीय दवाखाना श्रेणी-१ मध्ये परिचर पदावर कार्यरत असलेले भीमराव विश्वनाथ वीर यांना कनिष्ठ सहाय्यकपदी बढती मिळाली आहे. वीर हे औरंगाबाद जिल्ह्यातील विहामांडवा येथील रहिवासी आहेत. ते दहा वर्षांपासून परिचर पदावर जामखेड येथे कार्यरत होते. याबद्दल त्यांचा ग्रामस्थ विशाल भोजने, विनोद निलाखे, विलास जाधव, शिवाजी गवते, अमोल ढवळे यांनी सत्कार केला.