शहागड (जालना ) : अंबड तालुक्यातील कुरण येथे शुक्रवार मध्यरात्री तीन ठिकाणी चोरट्यांनी सशस्त्र दरोड टाकला. चोरट्यांनी ९ तोळे सोने आणि रोख ७० हजार रुपये असा जवळपास साडेतीन लाख रूपयांचा मुद्देमाल चोरुन नेला. चोरट्यांच्या मारहाणीत सुंदर सोलनकर गंभीर जखमी झाले असून त्यांना औरंगाबाद येथे उपचारासाठी हलविण्यात आले आहे.
शुक्रवारी मध्यरात्री कुरण येथे चोरट्यांनी धुमाकूळ घातला. चोरट्यांनी सुंदर सोलनकर घरातून रोख ५० हजार रूपये आणि ९ तोळे सोने, सुरेश बाजीराव सोनचाळे २० हजार रोख लंपास करण्यात आली. यावेळी चोरट्यांनी सुंदर सोलनकर व भगवान सिताराम काळे यांना मारहाण केली.
अंबड तालुक्यातील वडीगोद्री, शहागड, कुरण परिसरात गेल्या महिन्याभरात चोरीच्या घटना वाढल्या आहेत. परतूर तालुक्यातील आष्टी येथे दोन दिवसापूर्विच पडलेल्या दरोड्यात साडेपाच लाख रूपयांचा ऐवज चोरुन नेल्याची घटना ताजी आहे. याचा शोध अद्यापही पोलिसांना घेता आला नाही. वाढत्या चोरीच्या घटनांमुळे जिल्ह्यातील नागरिकांमध्ये रोष व्यक्त होत आहे.