अवैध गुटखा विक्रीकडे प्रशासनाचे दुर्लक्ष
घनसावंगी : शहरासह ग्रामीण भागात गुटख्याची खुलेआम विक्री सुरू आहे. राज्य शासनाने गुटखा विक्रीला बंदी घातली आहे. परंतु, परराज्यातून चोरट्या मार्गाने गुटखा गावा-गावात पोहोचविला जात असून, पानटपऱ्यांसह किराणा दुकानांमध्येही त्याची विक्री होत आहे. परंतु, संबंधित प्रशासकीय अधिकारी या गुटखा विक्रेत्यांवर सातत्याने कारवाई करीत नसल्याचे चित्र आहे.
सुखापुरी गावामध्ये स्वच्छता मोहीम
जालना : माझं गाव, सुंदर गाव या उपक्रमांतर्गत सुखापुरी गावामध्ये स्वच्छता मोहीम राबविण्यात आली. यावेळी पंचायत समिती सभापती रईस बागवान, विस्ताराधिकारी चव्हाण, डॉ. भोजने यांनी मार्गदर्शन केले. यावेळी ग्रामविकास अधिकारी के. के. कल्याणकर, ग्रा.पं. सदस्य भगवान राखुंडे, दत्तू फाटक, हबीब बागवान, अशोक राक्षे, नसीर बागवान, बाबासाहेब बाबर,राजू बागवान, राम लवटे आदींची उपस्थिती होती.
विस्कळीत वीजपुरवठा; ग्राहकांची गैरसोय
भोकरदन : शहरासह ग्रामीण भागातील वीजपुरवठा सतत खंडित होत आहे. खंडित वीजपुरवठ्यामुळे लघु व्यवसाय ठप्प होत असून, शेतातील कामांवरही परिणाम होत आहे. त्यामुळे संबंधित अधिकाऱ्यांनी लक्ष देऊन तांत्रिक समस्या सोडवाव्यात, सुरळीत वीजपुरवठा करावा, अशी मागणी होत आहे.
धनगर समाजाचे साखळी उपोषण
परतूर : तालुक्यातील लोणी शिवारात शेगाव- पंढरपूर मार्गावरील शेतवस्तीवर धनगर समाजाच्या विविध मागण्यांसाठी साखळी उपोषण सुरू आहे. आंदोलनाला वंचितचे उपाध्यक्ष रोहन वाघमारे यांनी भेट दिली. यावेळी तात्याराव बहिरे, महादेव बहिरे व इतरांची उपस्थिती होती.