टेंभुर्णी : टेंभुर्णी ग्रामपंचायतीत दोन्ही पदांवर महिला विराजमान झाल्याने प्रथमच येथे महिलाराज आले आहे. शुक्रवारी झालेल्या सरपंच-उपसरपंच पदाच्या निवडणुकीत सरपंचपदावर भाजपाच्या सुमन लक्ष्मण म्हस्के, तर उपसरपंचपदावर भाजपाच्याच मनीषा संतोष पाचे यांची निवड झाली आहे.
जाफराबाद तालुक्यातील सर्वांत मोठी ग्रामपंचायत असलेल्या या ग्रामपंचायतीत जिल्हा परिषद सदस्य शालिकराम म्हस्के यांच्या नेतृत्वाखाली झालेल्या निवडणुकीत भाजपने दहा जागा जिंकून एकहाती सत्ता आणली होती. येथील सरपंचपद मागासवर्गीय महिलेसाठी राखीव होते. सरपंच पदासाठी झालेल्या निवडणुकीत सुमन म्हस्के यांना ११, तर राष्ट्रवादीच्या संध्या कांबळे यांना सहा मते मिळाली, तर उपसरपंच पदासाठी मनीषा पाचे व राष्ट्रवादीचे रवींद्र उखर्डे यांनाही ११-६ मते मिळाली. अपक्ष निवडून आलेले एकमात्र सदस्य राम गुरव यांनी भाजपच्या पारड्यात मतदान केल्याने भाजपचे एक मत वाढले. निवडणुकीनंतर भाजपच्या कार्यकर्त्यांनी एकच जल्लोष केला. यावेळी जि. प. सदस्य शालिकराम म्हस्के, माजी पं. स. सदस्य दिनकर देशमुख, माजी सरपंच लक्ष्मण शिंदे, माजी उपसरपंच फैसल चाउस, मुक्तारखा पठाण, गौतम म्हस्के, शिल्पा देशमुख, कमल मुळे, चंद्रभागा सोनसाळे, सुशीला कुमकर, संगीता अंधारे, धनराज देशमुख, शिवाजी मुळे, रामकीसन सोनसाळे, सर्जेराव कुमकर, गजानन अंधारे आदींसह भाजप कार्यकर्त्यांची मोठी उपस्थिती होती.
फोटो- टेंभुर्णीच्या सरपंचपदी सुमन म्हस्के व उपसरपंचपदी मनीषा पाचे यांची निवड झाल्यानंतर नवनिर्वाचित सरपंच उपसरपंचासह जल्लोष करताना जिल्हा परिषद सदस्य शालिकराम म्हस्के, दिनकरराव देशमुख, फैसल चाऊस, गौतम म्हस्के आदी.