राणी उंचेगाव : घनसावंगी तालुक्यातील राणी उंचेगाव परिसरात मोसंबीच्या अंबिया बहराची फूलगळ होत असल्याने शेतकरी चिंतेत सापडले आहेत. कृषी विभागाने मार्गदर्शन करण्याची मागणी करण्यात आली आहे.
घनसावंगी तालुक्यातील राणी उंचेगाव परिसरात शेतकऱ्यांनी मोसंबीची लागवड केली आहे. यंदा मुबलक पाणीसाठा असल्याने शेतकऱ्यांना चांगल्या उत्पन्नाची अपेक्षा होती. त्यानंतर अंबिया बहर फुटलाही होता. परंतु, सध्या अंबिया बहराची फूलगळ होत असून, शेतकरी चिंतेत सापडले आहेत. अंबिया बहर जानेवारी ते फेब्रुवारी महिन्यात फुटतो. यंदा परतीचा पाऊस लांबल्यामुळे शेतकऱ्यांना ताण देता आला नाही. तसेच मशागतही करता आली नाही. यामुळे अंबिया बहराचे नियोजन कोलमडले होते. त्यातच मागील २० ते २५ दिवसांपासून अंबिया बहर फुटत आहे. परंतु, सध्या फूलगळ होत असल्याने शेतकरी चिंतेत्त सापडले आहेत. कृषी विभागाने मार्गदर्शन करावे, अशी मागणी होत आहे. मोसंबीच्या अंबिया बहराच्या फूलगळीच्या नियंत्रणासाठी शेतकऱ्यांनी १९:१९:१९ हे खत द्यावे, असे तालुका कृषी अधिकारी राम रोडगे यांनी सांगितले.
प्रतिक्रिया
यंदा मुबलक पाणीसाठा असल्याने चांगल्या उत्पन्नाची अपेक्षा होती. मोसंबीचा अंबिया बहरही फुटला होता. परंतु, सध्या फूलगळ होत आहे. त्यामुळे उत्पन्नात मोठी घट होण्याची शक्यता आहे. कृृषी विभागाने मार्गदर्शन करावे.
- प्रताप ढेंबरे, शेतकरी, निपाणी पिंपळगाव